गौरव सिंगाची कूड सांपडली

भांगरभूंय | प्रतिनिधी

काजरेद्याट घसघश्यार पर्यटकांक बंदी घालची; थळाव्यांची मागणी

वाळपय: सत्तरी म्हालांतल्या सांवड्डें पंचायत वाठारांत काजरेद्याट हे सुवातेर सोमारा वास्कोचे दोग तरणाटे बुडिल्ले. तातूंतल्या शशी सोमनाळ हाची कूड सोमारा सांपडिल्ली. पूण गौरव सिंग हाची कूड सोद करून लेगीत सांपडूंक नाशिल्ली. काल तिसऱ्या दिसा सकाळीं कूड उफेतना दिसून आयली.

मजगतीं, काजरेद्याट घसघसो वाठार हो घातक आसून हे सुवातेर पर्यटकांक बंदी घालची अशी मागणी थळाव्या लोकांनी केल्या. हे विशीं पुलीस आनी कर्मचाऱ्यांनी खासा लक्ष दिवचें अशी मागणी केल्या. थळावे आमदार आनी मंत्री विश्वजीत राणे हांणी लेगीत ह्या घसघश्यार पर्यटकांक बंदी घालपाची मागणी केल्या.

हे विशींची म्हायती अशी, वास्को सावन वट्ट आठ जाणांचो पंगड काजरेद्याट घसघश्यार पिकनिके खातीर आयिल्लो. त्या पंगडांतले शशी सोमनाळ आनी गौरव सिंग हे दोगूय उदकांत न्हाता आसतना अचकीत बुडिल्ले. शशी सोमनाळ हाची कूड सोमारा सांपडिल्ली. जाल्यार गौरव सिंगाची कूड फाटल्या दोन दिसां सावन बेपत्ता आशिल्ली. ताचो सोद पुलीस, उजो पालोवपी दळाचे जवान, रान खात्याचे कर्मचारी हांणी घेतिल्लो. पूण ताची कूड सांपडूंक नाशिल्ली. निमाणे बुधवारा नौदळाच्या जवानांक आपयिल्ले.

काल सकाळीं परतून एकदां कुडीचो सोद घेवपा खातीर मोहीम हातांत घेतली तेन्ना सुमार 11 वरांचेर गौरव सिंग हाची कूड अचकीत उदकाचेर उफेतना सांपडली. हाका लागून फाटल्या तीन दिसां सावन सुरू आशिल्ली सोद मोहीम निमाणें सोंपली. ही कूड उदका भायर काडले उपरांत वाळपय पलिसांनी पंचनामो करून कूड फुडले तपासणे खातीर बांबोळे गोंय वैजकी म्हाविद्यालयांत धाडून दिल्या.

मजगतीं, ह्याच वर्सा घसघश्या विशीं आकर्शण निर्माण जालां. कारण ह्या घसघश्याचे फोटे फेसबूक, इंस्टाग्राम, व्हॉट्सअ‍ॅप हांचेर सेगीत येत आसतात. हाका लागून घसघश्या विशीं आकर्शण निर्माण जालां. ह्या वर्सा व्हड प्रमाणांत पर्यटक वाठारांत येत आशिल्ल्याची म्हायती थळाव्यां कडल्यान मेळ्ळी. पूण घसघश्यार न्हावप घातक आसा. कारण उदकाचो अदमास येनाशिल्ल्यान बुडपाचे प्रकार सेगीत घडूंक शकतात. हाका लागून हाची खबरदारी घेवन पुलीस आनी रान खात्याच्या कर्मचाऱ्यांनी हे सुवातेर पर्यटकांक येवपा पसून बंदी घालची अशी मागणी थळाव्या लोकांनी केल्या.