गोविंद गावडे हांचें आयज शक्तीप्रदर्शन

भांगरभूंय | प्रतिनिधी

मंत्रीपद गेल्या उपरांत कार्यकर्त्यांची आपयल्या सभा

भांगरभूंय । प्रतिनिधी

पणजी : मंत्रीपद गेल्या उपरांत आमदार गोविंद गावडे हांणी आयज 22 जूनाक प्रियोळ मतदारसंघांतल्या कार्यकर्त्यांची सभा आपयल्या. माशेलांतल्या हॉलांत सांजे 4 वरांचेर ही सभा जातली. आपली भुमिका आनी फुडले वाटचालीचेर आपूण भाश्य करतलो. कार्यकर्त्यांच्यो भावना लेगीत जाणून घेतलो, अशें गोविंद गावडे हांणी सांगलें.

सगल्यांत पयलीं 2017 त प्रियोळ मतदारसंघांतल्यान अपक्ष म्हूण गोविंद गावडे वेंचून आयिल्ले. भाजपाक तेंको दिवन तेन्ना मनोहर पर्रीकार सरकारांत ते मंत्री जाले. उपरांत डॉ. प्रमोद सावंत हांच्या सरकारांत लेगीत ते मंत्री आशिल्ले. फाटले वेंचणुके पयलीं तांणी भाजपांत प्रवेश केलो आनी प्रियोळ मतदारसंघांतल्यान वेंचणूक लडयली. भाजपाचे आमदार जाले उपरांत परतून सरकारांत ते मंत्री जाले. कला अकादमी नूतनीकरण तशेंच हेर कांय वक्तव्यांक लागून ते सेगीत वादांत आडकले. फोंडेंचे कार्यावळींत आदिवासी कल्याण खात्याचेर टिका केले उपरांत तांचें मंत्रीपद संकश्टांत आयलें. गोंय क्रांती दिसा 18 जूनाक मंत्री म्हूण तांकां काडिल्ल्याचो आदेश जारी जालो. आमदार, मंत्री तशेंच पदाधिकाऱ्यांची बेशिस्त वागणू पक्ष खपोवन घेवचो ना, अशें वक्तव्य प्रदेश अध्यक्ष दामू नायक हांणी तांचें मंत्रीपद काडले उपरांत केलां.

मंत्रीपद काडले उपरांत गोविंद गावडे हांणी पक्ष तशेंच मुख्यमंत्र्यांचेर थेट आरोप करूंक नासले तरी तांची निरशेवणी उक्ती जाल्या. माशेलांत जाल्ले एके कार्यावळीक आमदार म्हूण निमंत्रण आसून लेगीत ते हाजीर रावले नात. मुख्यमंत्री डॉ. प्रमोद सावंत हे कार्यावळीक मुखेल सोयरे म्हूण हाजीर आशिल्ले. गोविंद गावडे हे अनुसूचीत जमातीचे फुडारी आसा. आयचे सभेक तांच्या कार्यकर्त्यां सयत गावडा समाजाचे लोक व्हडा संख्येन हाजीर रावतले. विधानसभा वेंचणुके उपरांत परतून डॉ. प्रमोद सावंत मुख्यमंत्री जाले. सगल्यांत पयली निलेश काब्राल हांकां मंत्रीमंडळांतल्यान पयस केल्ले. सुमार अडेज वर्सां उपरांत आतां गोविंद गावडे हांकां मंत्रीपदा वयल्यान काडपाचो निर्णय जाला. गोविंद गावडे आयज कितें उलयता? तशेंच तांचे सभेक कितल्या लोकांची उपस्थिती आसतली, हाचे कडेन सगल्यांची नदर आसा.