भांगरभूंय | प्रतिनिधी
पणजी : कला संस्कृती खात्याचे मंत्री म्हणून गोविंद गावडे हांचे कडेन अकादमीचें अध्यक्षपद दिल्लें. मंत्रीपद गेले उपरांत आपोआप तांचें अध्यक्षपदूय गेलां, अशें मुख्यमंत्री डॉ. प्रमोद सावंत हांणी स्पश्ट केलें.
सरकारी आदेशा प्रमाण मंत्री गोविंद गावडे हांचे कडेन कला अकादमीचे अध्यक्षपद दिल्लें. मंत्रिपद गेल्ल्यान तांचें अध्यक्षपदूय गेलें काय? असो प्रस्न आमच्या प्रतिनिधीन विचारलो तेन्ना मुख्यमंत्र्यान वयर दिल्ली जाप दिली. तशेंत सरकार बेगीनूच नव्या अध्यक्षाची नियुक्ती करतलें अशेंय मुख्यमंत्र्यांनी स्पश्ट केलें.
आदिवासी कल्याण खात्याचेर टिका करपी मंत्री गोविंद गावडे हांकां बुधवारा सांजेवेळार तांच्या पदावेल्यान काडलो. मुख्यमंत्री डॉ. सावंत हांचे शिफारसी उपरांत तांकां त्या पदावेल्यान काडून उडोवपाचो निर्णय राज्यपालांनी घेतलो. आतां नवो मंत्री कोण आसतलो आनी सोपूत घेवपाची विधी केन्ना जातली, हे विशीं सगल्यांक उत्सुकताय आसा. मजगतीं नव्या मंत्र्याची सोपूत विधी बेगीनूच जातली, अशी शक्यताय उक्तायल्या.
केंद्रीय फुडार्यां कडेन चर्चा करून नव्या मंत्र्या विशीं मुख्यमंत्री योग्य वेळार निर्णय घेतलें, अशें प्रदेशाध्यक्ष दामू नायक हांणी सांगलें. हाका लागून नवे मंत्री तशेंच सोपूत विधी सुवाळ्याचो ‘सस्पेन्स’ कायम आसा.
कला आनी संस्कृती खात्याच्या मंत्र्या कडेनूच कला अकादमीच्या अध्यक्षपदाचो ताबो दितात. गावडे कला आनी संस्कृती मंत्री आशिल्ले. हाका लागून कला अकादमीचें अध्यक्षपद तांचे कडेन आशिल्लें. तांच्याच कार्यकाळांत कला अकादमीची दुरुस्ती आनी नुतनीकरण केल्लें. त्या वेळार कला अकादमीची नूतनीकरण निविदा आनी कामांत गैर वेव्हार जाल्ल्याचो आरोप कलाकार आनी विरोधक दोगूय करताले. मजगतीं, आतां तांचे कडेन कला आनी संस्कृती मंत्रिपद नाशिल्ल्यान तांचे कडल्यान कला अकादमीचें अध्यक्षपद वचप सभावीक आशिल्लें.
गावडे हांकां मंत्रिपदावेल्यान काडपा विशीं आमदार, मंत्री आनी राजकीय फुडार्यांनी विविध प्रतिक्रिया उक्तायल्यात. उपसभापती जोशुआ डिसोझा हांणी गावडे हांच्या कला आनी संस्कृती मंत्री म्हणून केल्ल्या कामाची तोखणाय केली. जाल्यार मंत्री म्हणून कोणाक दवरचें वा काडपाचें हो मुख्यमंत्र्यांचो विशेश अधिकार आशिल्ल्याचें महसूल मंत्री बाबूश मोन्सेरात हांणी सांगलें.
प्रदेशाध्यक्ष दामू नायक हांणी, हेर पक्षांतल्यान भाजपांत आसपाव जाल्ल्यांनी पक्षाची शिस्त आनी विचारसरणी स्वीकारणे बंधनकारक आसा. पक्ष शिस्त पाळयप ना वा बेजबाबदार विधानां केल्यार कारवाय अटळ आसा. मंत्री आनी आमदारां सयत सगल्यांच्या कामाचेर पक्षाचें लक्ष आसता, अशेंय तांणी स्पश्ट केलें.
नव्या मंत्रिपदा खातीर दिगंबर कामत?
गोविंद गावडे हांच्या मंत्रिपदाक लागून रितें जाल्ल्या पदा खातीर विवीध नांवां चर्चेंत आसात. हातूंत सभापती रमेश तवडकार, कळंगूटेचे आमदार मायकल लोबो आनी मडगांवचे आमदार दिगंबर कामत हांचीं नांवां जरी आसलीं तरी दिगंबर कामत हांचे वटेन सगल्यांची नदर आसा. सुत्रांनी दिल्ले म्हायती प्रमाण, आमदार कामत हांकां पयलीं मंत्रिमंडळांत प्रवेश मेळपाची शक्यताय आसा.
बेशिस्तीक पक्षांत जागो ना: दामू नायक
प्रदेशाध्यक्ष दामू नायक हांणी परत पक्षाचे शिस्तीचेर भर दिली. तांणी म्हणलें, पक्षाचे आमदार, मंत्री आनी पदाधिकारी हांचेर पक्ष नेतृत्वाचें सेगीत लक्ष आसता. पक्षांत बेशिस्तपणाक थारो ना. जे बेशिस्त आसात आनी पक्षाचे विचारसरणी कडेन प्रामाणीक आनी निश्टावान ना, तांचेर योग्य वेळार कारवाय करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
