भांगरभूंय | प्रतिनिधी
कला अकादमी नुतनीकरणांत भ्रश्टाचार नाः मुख्यमंत्री
विजय सरदेसायांचे आरोप भायरायले
पणजी : कला अकादमीच्या नुतनीकरणांत कामांत कसलोच भ्रश्टाचार जावंक ना. प्रक्रिया योग्य पद्दतीनूच जाल्या. ताका लागून कोणेच गरजे भायले आरोप करचे न्हय, अशें म्हणून मुख्यमंत्री डॉ. प्रमोद सावंत हांणी गोवा फॉरवर्डाचे आमदार विजय सरदेसाय हांणी केल्ले आरोप भायरायल्यात. तशेंच कला आनी संस्कृती मंत्री गोविंद गावडे हांकां ‘क्लीन चीट’ दिल्या.
कला अकादमीच्या नुतनीकरणा वयल्यान फाटल्या कांय म्हयन्यां पसून राजकी वातावरण तापिल्लें. कला अकादमीच्या इमारतीक कांय कडेन गळटी लागिल्ली. ताका लागून इमारतीचें नुतनीकरण करपाचो निर्णय मंत्री तशेंच कला अकादमीचे अध्यक्ष गोविंद गावडे हांणी फाटल्या कार्यकाळांत घेतिल्लो. ह्या कामा खातीर निविदा जारी करिनासतना राज्य मंत्रीमंडळाचे मान्यतायेन टेकटॉन बिल्डकॉन प्रायव्हेट लिमिटेड हे कंपनीक 3 मे 2021 दिसा कला अकादमीच्या नुतनीकरणाचें काम सुमार 39 कोटींक दिल्लें. पूण उपरांत ताचेर वेगवेगळे कर आकारिल्ल्यान हें काम 56 कोटी रुपयां मेरेन पाविल्लें. हेंच सूत्र धरून गोवा फॉरवर्डाचे आमदार विजय सरदेसाय हांणी मंत्री गोविंद गावडे हांकां विधानसभा आनी विधानसभे भायरूय घेरपाक सुरवात केल्ली. निविदा मागयनासतना काम सुरू करून गोविंद गावडे हांणी व्हड भ्रश्टाचार केल्ल्याचो दावोय तांणी केला.
विधानसभेच्या पावसाळी अधिवेशनांत हे विशीं जाल्ले चर्चे वेळार मंत्री गोविंद गावडे हांणी कला अकादमीच्या कामांत कसलोच भ्रश्टाचार जावंक नाशिल्ल्याचें सांगून शहाजहाँनान ताजमहालाच्या बांदकामा खातीर निविदा जारी करूंक नाशिल्ल्यो, असो मुद्दो तांणी मांडिल्लो.
हाचे वयल्यान विधानसभेंत आरोप-प्रत्यारोप जाल्ले. तशेंच हो विशय लावन धरून गोविंद गावडे हांकां मंत्रीपदा वयल्यान काडचे अशी मागणीय मुख्यमंत्र्यां कडेन केल्ली.
तशेंच सत्ताधारी भाजपाचे म्हणयारे सावियो रॉड्रिग्स हांणीय सरदेसाय हांकां तेंको दिवन कामा विशीं दुबाव उक्तायिल्लो.
अातां मुख्यमंत्री डॉ. प्रमोद सावंत हांणी बुधवारा हे सगलेच आरोप न्हयकारून मंत्री गावडे हांची फाटराखण केल्या.
श्वेतपत्रिका जारी करातः विजय
मुख्यमंत्री डॉ. प्रमोद सावंत हांणी आरोप भायरावपा आदीं विजय सरदेसाय हांणी पणजे पत्रकार परिशद घेवन कला अकादमीच्या नुतनीकरणाचो खर्च 66 कोटींचेर कसो पावलो, हे विशीं सरकारान श्वेतपत्रिका जारी करची. निवृत्त न्यायाधिशां वरवीं ह्या कामाची चवकशी करून मंत्री गोविंद गावडे हांकां मंत्रीपदा वयल्यान काडचे, अशी मागणी परतून एकदा केल्ली.
कला अकादमी ‘इफ्फी’ मेरेन जातली उक्तीं
बुधवारा सांजे मंत्री गोविंद गावडे अानी पीडब्ल्यूडी मंत्री निलेश काब्राल हांचे वांगडा मुख्यमंत्र्यान कला अकादमीच्या कामाची पळोवणी केली. अांतरराष्ट्रीय चित्रपट महोत्सवा मेरेन (इफ्फी) मेन अॉडिटोरियम वगळून हेर अकादमी उक्तीं करतले, जाल्यार मेन ऑडिटोरियम 8 डिसेंबर मेरेन लोकां खातीर उक्तें जातलें, अशी हमीय तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
