भांगरभूंय | प्रतिनिधी
संचालक मंडळाचे बसकेंत निर्णय, गिरायकांक थाकाय
भांगरभूंय । प्रतिनिधी
फोंडें: गोवा डेरीच्या दूद दरांत नव्या वर्साचे सुरवेक वाड करची न्हय तशेंच गरजेभायर भरती केल्ल्या उरिल्ल्या 10 कामगारांचेर कायदेशीर सल्लो घेवन फुडले बसकेंत निर्णय घेवचो, असो निर्णय शुक्रारा जाल्ले संचालक मंडळाचे बसकेंत घेतलो.
गोवा डेरीचे अध्यक्ष राजेश फळदेसाय हांचे अध्यक्षते खाला जाल्ले बसकेंत नव्या वर्साचे सुरवातीक दूद दरवाड करपाक खूबशा संचालकांनी नापसंती उक्तायली. ताका लागून नव्या वर्साचे सुरवाक दूद दरवाड करची न्हय, असो निर्णय बसकेंत घेतलो. पूण गोवा डेरीची अर्थीक स्थिती सुदारचे खातीर दूद दरांत वाड केले बगर संचालकां मुखार पर्याय नाशिल्ल्याचें दिसून येता. ताका लागून फुडल्या म्हयन्यांत खंयच्याय खिणाक दूद दरवाड जावपाची शक्यताय आसा. तेच वांगडा पोरूं गोवा डेरींत केल्ले नोकर भरतीचो प्रस्न बसकेंत चर्चेक आयलो. गरजेभायर 32 कामगारांची केल्ले नोकर भरतेक लागून गोवा डेरीचेर अर्थीक ताण पडला. ताका लागून हे आदीं 22 कामगारांक घरा धाडिल्ले. उरिल्ल्या 10 कामगारांक लेगीत घरा धाडपा खातीर कायदेशीर सल्लो घेवपाचो निर्णय बसकेंत घेतलो. बाजारांत सर्वेक्षण करपाचो वावर सुरू आसा. तें पुराय जाले उपरांत दूद दरवाड करपा संबंदांत विचार करतले, अशें अध्यक्ष फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.