भांगरभूंय | प्रतिनिधी
भांगरभूंय । प्रतिनिधी
पणजीः गोंय विद्यापिठाच्या गोंय वैजकी हॉस्पिटलांत पदव्युत्तर पदवी आनी पदविका अभ्यासक्रमाची प्रवेश प्रक्रिया बिरेस्ताराच्यान सुरू जातली. राज्यांतल्या विद्यार्थ्यां खातीरच्या 50 टक्के कोट्या खातीर ही प्रक्रिया 18 तें 25 ऑगस्ट मजगतीं जातली. ह्या वेळार प्रवेश अर्ज घेतले.
ज्यांची भारतीय वैजकी परिशदेंत (आयएमए) नोंदणी जाल्या वा वैजकीय पदव्युत्तर पदवी अभ्यासक्रमाची प्रवेश परिक्षा (एनईईटी-पीजी 2022) पास जाल्ले राज्यांतले विद्यार्थी हे खातीर अर्ज करपाक शकतात. 29 ऑगस्टाक अर्जांची छाननी करून पयली गुणवत्ता वळेरी हॉस्पिटलाच्या नोटीस बोर्डार लायतले. 5 सप्टेंबराक दुसरी गुणवत्या वळेरी लायतले. 12 सप्टेंबरांक कावंसिलिंगाची पयली फेरी जावून 15 सप्टेंबर मेरेन प्रवेश प्रक्रिया पुराय करतले, दुसरी फेरी 28 सप्टेंबराक जातली आनी 1 ऑक्टोबराक प्रवेश प्रक्रिया पुराय करतले.
17 सप्टेंबराक मॉप अप फेरी जातली आनी तातूंत वेंचून काडिल्ल्या विद्यार्थ्यांक 18 सप्टेंबराक प्रवेश दितले. निमणे तारखे उपरांत आयिल्ल्या अर्जांचो विचार करचे नात अशें कळीत केलां. वैजकी कावंसिलींग समितीच्या प्रसिद्धी पत्रका प्रमाण प्रवेश प्रक्रियेच्यो तारखा निश्चीत केल्यात. समितीच्या तारखानी कांय बदल केल्यार प्रवेश तारखांनी बदल जावपाक शकता अशें प्रसिद्धी पत्रकांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
