भांगरभूंय | प्रतिनिधी
भलायकी मंत्र्यान निर्माण केल्लो वाद थंड तकलेन केलो सुटावो; गोमॅकाँतलो निशेध सोंपलोपणजीः भलायकी मंत्री विश्वजीत राणे हांणी गोमॅकाँच्या डॉ. रुद्रेश कुट्टीकाराक केल्ल्या अपमानकारक वागणुकेक लागून फाटल्या चार दीस सावन चलत आयिल्लो वाद निमाणे मंगळारा मुख्यमंत्री डॉ. प्रमोद सावंत हांच्या हस्तक्षेपाक लागून सुटावो जालो.
बी-12 इंजेक्शना खातीर गोमॅकाँक आयिल्ल्या दुयेंती कडेन सारकें वागूंक नाशिल्ल्यान भलायकी मंत्री विश्वजीत राणे हांणी मुखेल वैजकी अधिकारी डॉ. रुद्रेश कुट्टीकार हांकां सगल्या मुखार अपमानींत केल्ले. ते उपरांत राज्यांतले विरोधी पक्ष आक्रमक जाले. तशेंच उपरांत ऑल इंडिया मेडिकल असोसिएशन (फायमा) आनी इंडियन मेडिकल असोसिएशनाच्या गोंय फांट्यानय आक्रमक भुमिका घेतली. ह्या प्रकरणांत मुख्यमंत्री डॉ. प्रमोद सावंत हांणी 72 वरां भितर कारवाय केली ना जाल्यार देशभर निशेध करपाची शिटकावणी दोनूय संघटणांनी दिली आसतना गोमॅकाँच्या दोतोरांनीय सोमारा सावन निशेध सुरू केलो. डॉ कुट्टीकाराचो अपमान केल्लो त्याच सुवातेर मंत्री राणे हांणी येवन माफी मागची अशी मागणी तांणी केल्या. ते उपरांत निशेध करपी दोतोरांचेंय शिश्टमंडळ सोमारा सांजवेळा मुख्यमंत्र्याक मेळ्ळे. दोतोरांचो निशेध जावपाची शक्यताय मतींत घेवन आयज दनपारां मुख्यमंत्री डॉ. प्रमोद सावंत हांणी डीन डॉ. बांदेकार आनी हेर वरिश्ठ दोतोरांची बसका घेवन, त्यांच्याे मागण्या बेगिनूच पुराय करपाची हमी दिवन आंदोलन फाटीं घेवपाक तांकां भाग पाडले.
मजगतीं, तांच्या विनंतीचो मान राखून निशेध फाटीं घेतिल्ल्या खातीर मुख्यमंत्री तांचे उपकार मनले. तांणी सांगलें, दोतोरांची मागणी न्याय्य आशिल्ली. देखूनच सरकारान त्यो मान्य केल्यो असोय उल्लेख तांणी केला.
…………………………………….
भलायकी मंत्री राणे हांणी डॉ. रुद्रेश कुट्टीकार हांचे कडेन केल्ल्या गैरवागणुकेक लागून मंगळारा आंतरराष्ट्रीय पांवड्यारय परिणाम जालो. इंग्लंडांतले जठरान्तर वैज डॉ. कीथ सियाऊ डॉ. कुट्टीकार हांकां आपल्या वांगडा इंग्लंडांत सेवा दिवपा खातीर येवचे असो प्रस्ताव सोशल मिडिया वरवीं दिलो जाल्यार डॉ. किथ सियाऊ हांच्या प्रस्तावाक तेंको दिवन गोंयांतले हेल्थ कोच डॉ. अंशुल हांणी डॉ. रूद्रेश कुट्टीकार हांणी ही संद स्विकारची आनी आपल्या कामाची कदर करपी देशांत सेवा दिवची, असो सल्लो दिलो.
डॉ. मजगतीं, डॉ. रुद्रेशान ही संद मान्य करून आपल्या वावराक मोल दिवपी देशांत सेवा करची’.
अतिरिक्त पुलीस कर्मचारी आनी शिस्तबद्ध समिती तयार करतले
दोतोरां कडेन जाल्ले बसकेंत तांणी केल्ल्यो सगल्यो सात मागणी आमी पुराय करतले अशें आमी तांकां आश्वासन दिलां. आतां सावन हॉस्पिटलांत व्हिडियोग्राफीचेर बंदी घालतले, व्हीआयपी संस्कृताय बंद जातली, दोतोरांच्या सुरक्षे खातीर गोमॅकाँ वाठारांत आनीक 50 पुलीस अधिकाऱ्यांची नेमणूक जातली, थंयच्या पुलीस स्टेशनांत उपनिरिक्षकाची नेमणूक जातली, आनी फुडाराक गोमॅकाँत अशी घडणूक घडची न्हय हे खातीर शिस्तबद्ध समिती तयार जातली असो उल्लेख मुख्यमंत्र्यानीय ह्या वेळार केलाे.
……………………………….
दरेका दुयेंतीक उंचेल्या दर्जाची भलायकी सेवा फावो
मुख्यमंत्र्याच्या हस्तक्षेपा उपरांत निशेध फाटीं घेतले उपरांत गोमॅकाँत उपचारा खातीर येवपी दरेका दुयेंतीक व्हीआयपी हस्तक्षेपा बगर उच्च दर्जाची भलायकी सेवा मेळटली अशें दोतोरांनी आश्वासन दिलें.
भलायकी मंत्र्यान कुर्सीचो अपमान केलो
भलायकी मंत्री राणे डॉ. रुद्रेश कुट्टीकार हांचो न्हय जाल्यार ते तो बसता त्या कुर्सीचो अपमान केलो. देखूनच भलायकी मंत्र्यान तेच सुवातेर येवन डॉ. कुट्टीकारा कडेन माफी मागची अशें निशेध करपी दोतोरांक दिसलें. निशेधा वेळार तांणी केल्ल्यो सगळ्यो मागणी वैध आशिल्लीं. देखून मुख्यमंत्री डॉ. प्रमोद सावंत हांणीय त्यो मान्य केल्यात अशें डॉ. मधू घोडकिरेकार हांणी हे निमतान उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
