भांगरभूंय | प्रतिनिधी
भलायकी मंत्री विश्वजीत राणे हस्तुकीं उक्तावण
पणजी: गोंय वैजकी म्हाविद्यालयांत नवें हेमोफिलिया उपचार केंद्र सुरू केलां. काल (शुक्रारा) भलायकी मंत्री विश्वजीत राणे, गोंय वैजकी म्हाविद्यालयाचे डीन डॉ. शिवानंद बांदेकार, डॉ. अनार खांडेपारकार हांचे हाजिरेंत ह्या उपचार केंद्राचें उक्तावण केलें.
ह्या वेळार भलायकी मंत्र्यांनी केईएम हॉस्पिटलांतल्या दोतोरां बरोबर चर्चा केली, तशेंच हेमोफिलिया उपचार केंद्रा विशीं म्हायती समजून घेतली. ह्या दुयेंतींक बरी सेवा मेळची हे खातीर ह्या दोतोरां बरोबर विवीध कबलातीय केल्यो. गोंयच्या दुयेंतींक हाचो फायदो चड जावचो हे खातीर हें उपचार केंद्र सुरू केलां अशें मंत्री राणे हांणी सांगलें.
भलायकी मळार खूबशे नवेनवे बदल करीत आसात. लोकांक बऱ्यो सुविधा मेळच्यो, तशेंच सगल्या दुयेंसांचेर उपचार करूंक मेळचे हे खातीर नवीं आधुनीक उपचार केंद्रां सुरू करतात. आतां लोकांक गोंया भायर भलायकेच्या उपचारा खातीर वचपाची गरज ना. सुपर स्पेशलिटींत खूबशा आधुनीक उपचार केंद्रांची सेवा उपलब्ध आसा. चडांत चड भलायकी मळार बदल करून लोकांक सगल्यो सेवा उपलब्ध करून दिवपा खातीरचो यत्न आसा अशें भलायकी मंत्री विश्वजीत राणे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
