भांगरभूंय | प्रतिनिधी
जिल्हो, उपजिल्हो हॉस्पिटलांनीय निर्णय लागूः भलायकी मंत्री
पणजी : बांबोळे गोंय वैजकी म्हाविद्यालया सयत (गोमॅकाॅ) दोनूय जिल्हो आनी उपजिल्हो हॉस्पिटलांनी उपचारा खातीर प्रवेश घेतना कोवीड अँटीजन चांचणी सक्तीची केल्या. नागरिकांच्या सुरक्षेचे नदरेन हो निर्णय घेतला, अशी म्हायती भलायकी मंत्री विश्वजीत राणे हांणी दिली.
गोंयांत परतून एकदा कोरोना प्रसार सुरू जाला. जायते बादीत मेळत आसात. कोरोनाच्या प्रसाराचेर नियंत्रण दवरपाच्या हेतान गोमॅकॉ सयत जिल्हो आनी उपजिल्हो हॉस्पिटलांत दाखल जावप्यांनी अँटीजन चांचणी करप गरजेचें, अशें भलायकी मंत्री राणे हांणी सांगलें.
डेंग्यूच्या दुयेंतींनी फाटल्या कांय दिसां पसून वाड जायत आसा. गांवगिऱ्या वाठारांत मेळपी डेंग्यूच्या दुयेंतींक उपचारा खातीर थेट गोमॅकाँत उपचारा खातीर धाडटात. ताका लागून गोमॅकॉचेर मोट्या प्रमाणांत ताण आयला. दुयेंतींक जमनीचेर न्हिदचे पडटा. ह्या प्रकाराची आपूण स्वता मंगळारा रातीं गोमॅकॉक भेट दिवन पळोवणी केल्या. ते भायर गोमॅकाँतल्या 70 दुयेंतींक बेगोबेग सुपर स्पेशालिटी विभागांत दवरल्यात, अशें तांणी सांगलें.
मजगतीं, सुमार 270 कोटी रुपया खर्चून उबारपी टर्शरी कॅन्सर सेंटराचें काम नेटान सुरू अासा. पद्मश्री अमीत मायदेव हांची सुपर स्पेशालिटी विभागांत नेमणूक केल्या. ह्या विभागांत हेर कांय तज्ञ दोतोर सेवेंत घेतल्यात. तांचो दुयेंतींक निश्चीत लाव मेळटलो, असो विस्वास भलायकी मंत्री राणे हांणी उक्तायलाे.
हाचे मुखार दुयेंतींक जमनीचेर न्हिदपाक दिवचे नात
एकाय दुयेंतीक जमनीचेर न्हिदचे पडचे न्हय हे खातीर सामुदायीक, प्राथमीक, जिल्हो, उपजिल्हो हॉस्पिटलांतले कर्मचारी, साधनसुविधांनी वाड करतले. डेंग्यू जाल्ल्या दुयेंतींतले पेशी उण्यो जातात. ते खातीर तांचेर लक्ष दवरून रावप गरजेचें. राज्यभरांतल्या खाजगी दोतोरांनीय अशा दुयेंतींचेर लक्ष दवरपाचें आनी तांचेर गरजेचें उपाय करपाचे निर्देश भलायकी मंत्री राणे हांणी दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.