भांगरभूंय | प्रतिनिधी
अलुरांतल्या प्लेटीनम ओव्हलाचेर चालू आशिल्ले कॅप्टन थिमाप्पा स्मृती चार दिसांचे लडतीच्या दुसऱ्या दिसाचे अखेर मेरेन गोंय पंगडान छत्तीसगडाच्या पयल्या डावांतले 467 धांवड्यांक 4 बाद 157 अशी जाप दिली.
पयल्या दिसाच्या 7 बाद 289 धांवड्यां वयल्यान खेळपाक सुरवात करपी छत्तीसगडाच्या अखेरच्या तीन विकेटींनी पंगडांचे धांवसंख्येंत आनीक 178 धांवड्यांची भर घाली.
छत्तीसगडाचो मुखेली शशांक सिंगान गोंयची बॉलींग फोडून काडली. ताणें 131 बॉलांनी सात चवके आनी आठ सक्यांचे मजतीन 136 धांवड्यो केल्यो. ताणें आठवे विकेटी खातीर सुमीत रुईकरा वांगडा 178 धांवड्यांची भागिदारी केली. सुमितान 183 बॉलांनी नाबाद 86 धांवड्यो केल्यो. हातूंत तीन चवक्यांचो आस्पाव आशिल्लो.
गोंया वतीन मुखेली दर्शन मिशाळ आनी मोहीत रेडकार हांणी दरेकी 4 विकेटी घेतल्यो, जाल्यार अर्जुन तेंडुलकरान 2 बॅट्समनांक बाद केले.
गोंयान खेळ सोंपलो त्या वेळार आपल्या पयल्या डावांत 4 विकेटी व्हगडावन 157 धांवड्यो केल्ल्यो. ओपनर आनी प्रोफेशनल क्रिकेटर रोहन कदम परतून एकदा आपल्या तिसऱ्या डावांत अपेशी थारलो. तो 17 धांवड्यो करून तंबूंत परतलो. ते उपरांत खेळपट्टीचेर जम बसयल्या उपरांत सदचे भशेन इशान गडेकारान निर्शेणी हाडली. ताणें 52 बॉलांनी स चवक्यांचे मजतीन 45 धांवड्यो केल्यो. जाल्यार स्नेहल कवठणकार फकत तीन धांवड्यो करून तंबूंत परतलो.
तेजराणा आनी के व्ही सिद्धार्थ ही जोडी जम बसतयली अशें दिसता आसतना सिद्धार्थ 28 धांवड्यो करून बाद जालो. दोगांयनी चवथे विकेटी खातीर 51 धांवड्यांची भागिदारी केली.
ते उपरांत अभिनव तेजराणा आनी दीपराज गांवकार हांणी छत्तीसगडाक आनीक विकेट मेळोवन दिली ना. तेजराणा 96 बॉलांनी 43 धांवड्यो करून खेळटा. ताणें तीन चवके आनी एक सको मारला. ताका साथ दिवपी दीपराज 15 धांवड्यांचेर खेळटा.
छत्तीसगडा वतीन सुमीत रुईकरान 2 जाल्यार शुभम अगरवाल आनी सानिध्य हुर्कत हांणी दरेकी एक विकेट घेतली. गोंय पयल्या डावांत अजून 310 धांवड्यांनी फाटीं आसा.
थोडे भितर धांवतकटोः छत्तीसगड (पयलो डाव) 7 बाद 289 वयल्यान 135.4 ओव्हरींनी 467 (शशांक सिंग 136, सुमीत रुईकर नाबाद 86, आशिष चौहान 9, प्रवीण कुमार यादव 0 धांवडी.
बॉलींगः लक्ष्य गर्ग 16-43-0, अर्जुन तेंडुलकर 24-74-2, विजेश प्रभुदेसाय 23-60-0, दीपराज गांवकार 8-27-0, मोहीत रेडकार 35-140-4, दर्शन मिशाळ 29.5-107-4.
गोंयः (पयलो डाव) 4 बाद 157 (रोहन कदम 17, इशान गडेकार 45, अभिनव तेजराणा खेळटा 43, स्नेहल कवठणकार 3, के व्ही सिद्धार्थ 28, दीपराज गांवकार खेळटा 15.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
