गोंय 37 धांवड्यांनी हारलें

भांगरभूंय | प्रतिनिधी

गोंयाक सय्यद मुश्ताक अली करंड टी-20 सर्तींत हैदराबादा कडल्यान 37 धांवड्यांनी हार घेवची पडली. हे हारीक लागून फास्ट बॉलर अर्जुन तेंडुलकराचे यत्न फुकट गेले. ताणें चार ओव्हरींनी फक्त 10 धांवड्यो दितना 4 विकेटी घेतल्यो.

ते पयलीं सवाई मानसिंग स्टेडियमाचेर गोंयान टॉस जिखून हैदराबादाक बॅटींग करपाचें आमंत्रण दिलें. हैदराबादान निर्धारीत 20 ओव्हरींनी 6 विकेटी वगडावन 177 धांवड्यो केल्यो. प्रत्युत्तर दितना गोंयचो डाव 18.5 ओव्हरींनी 140 धांवड्यांचेर सोंपलो. गोंया वतीन एकाय बॅट्समनाक व्हड खेळी करपाक जमली ना. ओपनर आदित्य कौशिकान 33 धांवड्यांचें योगदान दिलें.

ते पयलीं अर्जुना खेरीत दर्शन मिशाळान एक विकेट घेतली. पूण, एके विकेटी खातीर ताणें दोन ओव्हरींनी 23 धांवड्यो दिल्यो. ह्या दोगां खेरीत गोंयच्या एकाय बॉलराक विकेट घेवपाक जमली ना. हैदराबादा वतीन मुखेली तन्मय अग्रवालान 55 आनी तिलक वर्मान 62 धांवड्यांची खेळी केली.