भांगरभूंय | प्रतिनिधी
भांगरभूंय । प्रतिनिधी
सावयवेरेंः राष्ट्रीय खेळां सर्तीत मल्लखांब सर्तींत कांस्या पदक मेळोवपी कोने- प्रियोळ हांगच्या युतिका राजू सतरकार हाचो गोंय सतरकार म्हासंघा वतीन भोवमान केलो. भोवमान म्हणून ताका एक लाख रुपये, यादस्तीक आदले सभापती तशेंच सद्याचे राज्याचे म्हायती आयुक्त विश्वास सतरकार हांचे हस्तुकीं भेटयलें. फोंडें तालुक्यांतल्या केरी पंचायत सभाघरांत ही कार्यावळ जाली.
ह्या वेळार मुखेल सोयरी म्हणू केरीची सरपंच तृप्ती नायक, गोंय मल्लखांब असोसिएशनाचे सचीव देवदत्त केरकार, कार्याध्यक्ष रोहिदास सतरकार, सतरकार म्हासंघाचो उपाध्यक्ष प्रशांत मायणेकार हाजीर आशिल्ले. पंतप्रधान नरेंद्र मोदी हांणी भारतीय खेळांक प्राधान्य दिवंन ते राष्ट्रीय पांवड्यार व्हरपा खातीर यत्न केले. गोंयांत मल्लखांब हो खेळा प्रकार कांय वेंचीक गांवांनी आसा. कोने- प्रियोळ सारक्या कुळागरां आशिल्ल्या गांवगिऱ्या वाठारांतल्या युतिकान व्हडा कश्टान राष्ट्रीय पावंड्यार पदक मेळयलें ही गोंयकारां खातीर अभिमानाची गजाल आसा. गोंयकार खेळांत फाटीं नात हे युतिकान देशाक दाखोवन दिलां अशें विश्वास सतरकार हांणी सांगलें.
जिद्द आनी परिश्रम करपाची तयारी आसल्यार गरीब घराब्यांतली भुरगीं लेगीत राष्ट्रीय पांवड्यार बरी कामगिरी करून दाखोवपाक शकतात अशें सरपंच तृप्ती नायक हिणे सांगलें. गोंयच्या खेळगड्यांनी राष्ट्रीय तशेंच आंतरराष्ट्रीय पांवड्यार बरी कामगिरी करची हे खातीर खेळां असोसिएशना तशेंच सरकारान तांकां बरें प्रशिक्षण मेळटले हांची वेवस्था करपाक जाय अशें देवदत्त केरकारान सांगलें. मल्लखांब प्रशिक्षकांचो गोंयांत उणाव आसा हे खातीर तांणी खंत उक्तायली.
अनुज सतरकारान प्रास्तावीक करून युतिका सतरकाराच्या मल्लखांब खेळा संबंदीीचो म्हायतीपट दाखयलो. मल्लखांब सर्तींत वांटेंकार जाल्ल्या दिव्या सतराकार,समिक्षा गावडे, प्राजक्ता गावडे आनी खुशी सतरकार हांचो ह्या वेळार भोवमान केलो. महेश शिलकारान कार्यावळीचें सूत्रसंचालन केलें. उदय गांवकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
