गोंय वैजकी म्हाविद्यालयात दोतोर चड तेप कंत्राटाचेर आसात, सेवेत कायम करपाचो प्रस्ताव ना

भांगरभूंय | प्रतिनिधी

पणजी, प्रतिनिधी : गोंय वैजकी म्हाविद्यालयात दोतोर पसून १० वर्सा परस चड तेप कंत्राटी पद्दतीचेर सेवेत आसा. गोंय वैजकी म्हाविद्यालय, दंत म्हाविद्यालय आनी भलायकी संचालनालय मेळोन १८०३ कर्मचारी कंत्राटी पद्दतीचेर बरीच वर्सा काम करतात. आमदार एल्टन डिकोस्ता हांचे प्रस्नाक भलायकी मंत्री विश्वजीत राणे हांणी ही जाप दिल्या. ह्या सगळ्या कंत्राटी कामगारांक सेवेत कायम करपाचो प्रस्ताव ना, अशेंय जापेत भलायकी मंत्री राणे हांणी म्हणलां.
गोंय वैजकी म्हाविद्यालय हॉस्पिटलात दोतोरां सयत ५५४ कर्मचारी कंत्राटाचेर आसा. भलायकी संचालनालयात १२०७ कर्मचारी कंत्राटी पद्दतीचेर नोकरेत आसा. दंत म्हाविद्यालयात १२ जाल्यार मानसोपचार हॉस्पिटलात ३० कर्मचारी कंत्राटाचेर आसा.
गोंय वैजकी म्हाविद्यालय हॉस्पिटलात युरोलॉजी फाट्यांत एक दोतोर फाटली १९ वर्सा कंत्राटी पद्दतीचेर आसा. तशें कार्डिओलॉजी फाट्यांत एक दोतोर १० वर्सा कंत्राटी पद्दतीचेर आसा. वट्ट ६१ दोतोर कंत्राटी पद्दतीचेर नोकरेत आसा. ५ ते ९ वर्सा मेरेन कंत्राटी सेवेत आशिल्ले बरेच दोतोर आसा. ते भायर बऱ्योच नर्सी आनी तंत्रज्ञ मेळोन कंत्राटाचेर आसा.
आयपीएचबी मदी क्लिनिकल सायकोलोजिस्ट, लेक्चरर आनी पेशंट केर अटेंडंट कंत्राटाचेर आसा. दंत म्हाविद्यालयात लेक्चरर, नर्स आनी एक्स रे टेक्निशियन कंत्राटाचेर सेवेत आसा.