भांगरभूंय | प्रतिनिधी
पणजी : राज्यांंत उटांंगाराचो पावस सुरू आसताना गोंय विधानसभेचें पावसाळी अधिवेशन आयज सोमारा सावन सुरू जाता. हें अधिवेशन 18 दीस चलतलें. आसगांव घर मोडपाचें प्रकरण, कला अकादमीचें बाबत नुतनीकरण, म्हादयचो प्रस्न, स्मार्ट सिटीच्या कामा उपरांंत रस्त्यांचेर पडिल्ली फोंंडकुलां ह्या तरेकवार प्रस्नांक लागून सरकाराची अधिवेशनांत कस लागतली. ह्या अधिवेशनांत अर्थसंकल्प संंमत करपा वांगडा चर्चा करून खात्यांंच्या मागण्यांंक संंमती मेळपाची आसा.
पयले तीन दीस अर्थसंकल्पाचेर चर्चा जावन विनियोग विधेयक संमत करतले. उपरांत उरिल्ले 15 दीस खात्यांच्या मागण्यांंक चर्चे उपरांत संंमती दितले. अधिवेशनांत 768 तारांंकीत आनी 2130 अतारांंकीत प्रस्न आमदारांं कडल्यान विचारल्यात. प्रस्नोत्तरा बगर झिरो आवर, लक्षवेधी सुचोवण्यो, परबीं दिवपी आनी आर्गां ओंपपी प्रस्ताव चर्चेक येतले. दर शुक्रारा पांच खाजगी थाराव, हेप्रमाण 15 थाराव चर्चेक येतले अशी म्हायती विधीमंंडळ सचीव नम्रता उल्मन हांणी दिली.
कोवीड तशेंच हेर विवीध कारणांक लागून तीन, चार वर्सां चड दिसांंचें अधिवेशन जावंक ना. हें अधिवेशन 18 दीस चलतलें. ताका लागून विवीध प्रस्नांचेर बरोच काळ चर्चा करपाची संद आमदारांक मेळटली. आसगांव घर मोडपाचें प्रकरण, कला अकादमीचें सदोश नुतनीकरण, स्मार्ट सिटीच्या कामाक लागून पणजेची जाल्ली अवस्था ह्या प्रस्नां वयल्यान अधिवेशन गाजपाचीं चिन्नां दिसतात. अधिवेशनांत येवपी सरकारी विधेयकां अजूनय निश्चीत जावंक नात, अशी म्हायती विधीमंडळ सचीव नम्रता उल्मन हांणी दिली.
प्रस्न चर्चेक येवच्या 48 वरांं पयलीं प्रस्नाच्यो जापो मेळपाक जाय, अशी मागणी विरोधी आमदारांंनी केल्या. जापो उसरां मेळटात हाका लागून अभ्यास करपाक वेळ मेळना, अशी विरोधी आमदारांंची कागाळ आसा. कांय प्रस्न तरेकवार खात्यांं कडेन संंबंंदीत आसतात. ह्या प्रस्नांंच्यो जापो मेळपाक कळाव जाता. हेर जापो प्रस्नोत्तर सत्रा पयलीं मेळटात अशें सभापती रमेश तवडकार हांंणी म्हणलां.
अधिवेशनांत विनियोग विधेयक संंमत जातलें. अधिवेशनांत येवपी हेर सरकारी विधेयकां अजून निश्चीत जावपाची आसात.
लोकसभा वेंचणुके उपरांंत जावपी हें पयलेंच अधिवेशन आसा. काँग्रेस पक्षाक दक्षीण गोंंयची सुवात राखपाक येस आयिल्ल्यान पक्षाचो आत्मविस्वास वाडला. काँग्रेस, आप आनी गोवा फॉरवर्ड हांणी सरकाराची कोंयंडी करपा खातीर रणनिती आंखल्या. हाका लागून मुख्यमंंत्री डॉ. प्रमोद सावंत तशेंच सरकाराचो अधिवेशनांत कस लागतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
