भांगरभूंय | प्रतिनिधी
-सभापती रमेश तवडकार हांणी घेतली बसका
पणजी: संसदेंत घुसखोरी जाले उपरांत गोंय विधानसभेचे सभापती रमेश तवडकार हांणी सुरक्षे खातीर जापसालदार आशिल्ल्या विधिमंडळ सचिवालयांतल्या उच्च अधिकाऱ्यांची काल बसका घेतली. बसकेंत तांणी गोंय विधानसभा संकुलांत कायमस्वरूपी तैनात आशिल्ल्या पुलीस अधिकाऱ्यां सयत संभाव्य समस्यांचो नियाळ घेतलो.
विधानसभा संकुलाच्या सुरक्षे खातीर नव्यान अत्याधुनीक प्रणाली सयत आनीक कितें करपाक मेळटले, हाचेर बसकेंत चर्चा जाली. शिंयाळे अधिवेशन सुरू जावपा पयलीं हाचेर उपाय काडटले. मुख्यमंत्री डॉ. प्रमोद सावंत हांचोय सल्लो घेतले, अशें सभापती रमेश तवडकार हांणी म्हणलें.
सध्या गोंय विधानसभेंत अधिवेशन काळांत दोट्टी सुरक्षा तपासणी प्रणाली आसा. थंय विभागांतले कर्मचारी तशेंच गोंय पुलीस तपासणी करतात. पयलीं संकुलाच्या प्रवेशदाराचेर आनी फुडें गॅलरीच्या प्रवेशदाराचेर अशा दोन टप्प्यांत ही तपासणी जाता.
जायते खेपे मंत्र्यांचे आनी आमदारांचे खाजी सेवेंतले कर्मचारी मेटल डिटेक्टरांतल्यान वचनात. तशेंच कांय खेपे थंय तैनात आशिल्ल्या सुरक्षा कर्मचाऱ्यांक तांची वळखपत्रां पडताळणेची सुरक्षा तपासणी ते करिनात.
विधानसभा संकूल आनी ताच्या वाठारांतली सुरक्षा ही सभापतीची खास जापसालदारकी. संकुलांतली सुरक्षा वेवस्थापीत करपा खातीर, सभापतींनी विधिमंडळ विभागांतले कर्मचारी नियुक्त केल्यात. तशेंच थंय कायमस्वरूपी गोंय पुलीस दळांतले कर्मचारी तैनात केल्यात. विधिमंडळ संकुलांतल्या सुरक्षा कर्मचाऱ्यांचे नेतृत्व पुलीस निरिक्षक दर्जाचे अधिकारी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
