भांगरभूंय | प्रतिनिधी
पणजी, बातमीदार : गोंय विद्यापिठाच्या विद्यार्थी मंडळाची रद्द जाल्ली वेंचणूक परतून जातली त्या खातीर आयज अर्ज दाखल करपाची निमाणी तारीख.
गोंय विद्यापिठान पदव्युत्तर विद्यार्थी संघटनेची वेंचणूक नामांकनां मान्य करून रद्द केल्ली. वेंचणुकेची पुराय प्रक्रिया परत जातली अशीय नोटीस जारी केल्ली. कुलगुरूच्या आदेशा प्रमाण वेंचणूक प्रक्रिया रद्द केल्या अशें विद्यार्थी कल्याण मंडळाच्या संचालकान नोटीसांत सांगिल्लें. पूण वेंचणूक कित्याक रद्द जाली हाचेर कांयच कारण दिवंक नाशिल्ले.
मजगतीं, पदव्युत्तर गट मंडळाची वेंचणूक 21 ऑगस्टाक जावपाची आशिल्ली, जाल्यार कार्यकारी मंडळाची वेंचणूक 1 सप्टेंबराक जावपाची आशिल्ली. विद्यापिठान 7 ऑगस्टाक अधिसुचोवणी जारी करून वेंचणुकेच्या कार्यावळीची वळेरी जाहीर केल्ली. गट परिशदेचे वेंचणुके खातीर उमेदवारी अर्ज भरिल्ले. कार्यकारी मंडळाचे वेंचणुकेंत अध्यक्ष, सचीव, खेळ आनी सांस्कृतीक सचीव, विद्यार्थी प्रतिनिधी, संशोधन विद्यार्थी प्रतिनिधी हीं पदां वेंचून काडपाचीं आशिल्लीं. गट प्रतिनिधी वेंचून आयले उपरांत कार्यकारी मंडळा खातीर नामांकनां सादर करपाची निमाणी तारीख 28 ऑगस्ट आशिल्ली. 29 ऑगस्टाक अर्जांची चवकशी जाले उपरांत उमेदवारी फाटीं घेवपाची निमाणी तारीख 30 ऑगस्टाक सांजवेळ 5 वरां मेरेन आशिल्ली. 1 सप्टेंबराक सकाळीं 11 ते 12 मेरेन वेंचणूक थारायल्ली. पूण मागीर ही सगळी प्रक्रिया रद्द जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
