भांगरभूंय | प्रतिनिधी
पणजी, प्रतिनिधी : नवी दिल्लीच्या प्रगती मैदानाचेर जाल्ल्या ४२ व्या भारतीय आंतरराष्ट्रीय वेपार मेळाव्यांतल्या गोंयच्या पॅव्हेलियनाक उत्कृश्ट सजावट आनी थीमॅटीक प्रेझेंटेशना खातीर उत्कृश्ट पॅव्हेलियनाचो पुरस्कार फावो जालो. आयटीपीओचे अध्यक्ष आनी वेवस्थापकीय संचालक प्रदीप सिंग खरोला हांच्या हस्तुकीं पुरस्कार भेटयलो.
प्रगती मैदानाचेर १०० चौ. मी. सुवातेत गोंय पॅव्हेलियनाची उभारणी करून आकर्शक अशी सजावट, मांडणी केल्ली. १४ नोव्हेंबर २०२३ दिसा म्हायती आनी प्रसिद्धी संचालक दीपक बांदेकार हांचे हस्तुकीं गोंय पॅव्हेलियनाचें उक्तावण जाल्लें.
१४ दिसांच्या वेपार मेळाव्यांत गोंय पॅव्हेलियनाक बरो प्रतिसाद मेळ्ळो. पॅव्हेलियनाक भेट दिवप्यांक उद्देगीक गुंतवणूकी खातीर आकर्शीत करपा वांगडाच राज्यांतल्या पायाभूत सुविधांची उदरगत, पर्यटन, उद्देग, येवजण्यो आनी धोरणांची म्हायती करून दिली, जाचो फायदो गोंयच्या उद्देग आनी पर्यटन वाठाराक जातलो.
गोंयच्या कलाकारांनीय गोंयच्या समृद्ध सांस्कृतीक परंपरांचें आनी दायजाचें सादरीकरण करून लोकांची मनरिजवण केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
