भांगरभूंय | प्रतिनिधी
पर्यटन मोसम तेंगशेर आसतना टॅक्सीकारांनी एमपीटी भायर जें कितें केलें, तें कोणाकूच मान्य आसचें ना. मुरगांव धक्यार देंविल्ल्या पर्यटकांक बसींत बसपाक वतना तांणी आडायले. बस ड्रायव्हरा कडेन वाद घालून पर्यटकांक आपल्या टॅक्सींनी बसपाची सक्ती केली, ही खबर बिरेस्तारा बरीच गाजली. हें युग तंत्रज्ञानाचें. संवसारांतल्या खंयच्या खाची कोनश्याक सोडाच, अंतराळ केंद्राचेर कितें घडटा, तें पसून कांय खीणांत सगल्यांक पळोवपाक मेळटा. ही एमपीटी भायली दादागिरीय अमेरिके सयत सगल्या खंडांनी पावली. अमेरिकेन वकिलातीन, वेपारी कचेरेनूय दखल घेतली. खून, मारामारी, ड्रग्साक लागून गोंयची बदनामी जाताच, आतां टॅक्सीकारांचें नांव आयलां. ताचे परिणाम कोरोनांतल्यान निकतेच उठिल्ल्या पर्यटन मळाक भोगचे पडूं येतात. तशें जावचें न्हय. आपूण कितें करता, ताचो विचार मनशान, खास करून वेवसायिकांनी करपाक जाय, तो हेच खातीर.
दोन वर्सां उपरांत गोंय पयलेच खेपे नेटान नवें वर्स मनयता. तेन्ना सगल्यांनीच सादूर रावपाक जाय. आपल्याच पांयांचेर आपणेच कुराड मारपा सारकी गजाल करपाक जायना. टॅक्सीकारांनी बस ड्रायव्हराचेर थापट मारलें, असो दावो कांय जाणांनी केला. आठ जाणांचेर गुन्यांव दाखल जाला. दोगांक अटक जाल्या. परत अशें घडल्यार कारवाय करपाची शिटकावणी पर्यटन मंत्र्यान दिल्या. क्रूझ बोटींतल्यान देंवतकच अमेरिकेचे हे पर्यटक भायर आयले आनी तांणी गोंय पळोवपाक कोचांतल्यान (व्हडल्यो बशी) वचपाचें थारायलें. तेन्ना टॅक्सीकारांनी तांकां आडायले. साहजिकूच सगलेंच कोफुसांव, केस्तांव. त्या पर्यटकांक घेवन ती बोट तशीच मुंबय गेली, अशीय खबर आसा. परतून गोंयांत येवपाचें थारलें जाल्यार धा फावटीं विचार करतलों, अशें क्रूझ बोटीच्या कॅप्टनान म्हणलां, असो दावो संबंदीत टूर कंपनीच्या वेवस्थापकान केला. तीन क्रूझ बोटी रद्द जाल्यात, अशेंय कांय जाण सांगतात. देव दिता आनी सैतान नाडटा, तसली ही गत. बोटी, विमानांनी येवपी चडशे पर्यटक गिरेस्त आसतात आनी ते डाॅलरांनी मोडटात. पर्यटन मळ तरतरतलें जाल्यार असलेच पर्यटक जाय, इतलेंय मस्ती करपी त्या अणभवी टॅक्सीकारांक खबर ना, हाचें अजाप दिसता.
मोपा विमानतळ सुरू जातलो. नवो विमानतळ, मिटराची सक्ती, अॅपा वरवीं सेवा दिवपी कंपनी सरकार हाडूंक सोदता हाचो राग नाय म्हणलो तरी टॅक्सीकारांक आसतलोच. आमच्यो टॅक्सी सोडून पर्यटक बशींनी वतात, तें पळोवन कांय जाणांची तळपांयांतली तिडक मस्तकाक चडली आसतली. भांगराचीं तांतयां दिवपी कोंबी शेजाऱ्याच्या घुडांत वताच कशी, अशें चिंतून फाटलो फुडलो विचार करीनासतना ते धांवले आनी त्रासांत पडले. तांकां सांबाळपाक इरमांव, पात्रांव सदचे भशेन मुखार येवंक नात. कारण तांकांय हे घडणुकेचें गांभीर्य कळलां आसतलें. गोवा मायल्स आनी पर्यटन टॅक्सीकारां मदीं कांय म्हयन्यां पयलीं पेटिल्लें. तांकां स्वताचो अॅप तयार करपाक, मिटर बसोवपाक सांगिल्लो. तोय वाद चलतालो. विमानतळाचेर आपल्या सोयऱ्यांक हाडपाक गाडी घेवन वचपी लोकांकूय ते आडायतात, अश्यो कागाळी आसात. ‘तुमकां परवडूं नाजाल्यार नाका, आमचे टॅक्सींत बसचेंच पडटलें, आमी सांगतात तितलें भाडें दिवचेंच पडटलें’, अशें वाद घालपी त्या टॅक्सीकारांचें म्हणणें बी ना मूं?
भायले पर्यटक येतात, ते चड करून थंयच बुकिंग करून येतात. वाहन खंयचें वापरपाचें, खंयच्या हाॅटेलांत रावपाचें, कितें पळोवपाचें, कितले दीस रावपाचें…. तें थारावपाचो अधिकार पर्यटकांचो. ‘जेवण सोंपलें, आतां पावभाजी खावन राव, वास्कोच्यान म्हापश्यां वचपाक तीन हजार दिवचे पडटले’, अशें आमी तांकां वा हेर खंयच्याच पर्यटकाक सांगपाक शकनात. पर्यटन वेवसायाचेर फक्त टॅक्सीकार अवलंबून नात. व्हडलीं- ल्हान हाॅटेलां, माण, गाडेकार, दूद, उदक, भाजी, फळां पिकोवपी, ताची पुरवण करपी, सोरो, चिकन, मटन, पाॅल्ट्री फार्म, टूर आॅपरेटर, प्रार्थना थळां, लाँड्री, बेकरी, खाणावळी. तातूंत काम करपी हजारांनी कामगार, कर्मचारी, अधिकारी……. ही यादी वाडत वतली. निदान हाचे मुखार पर्यटन मळा कडेन संबंदीत सगल्यांनी ‘अतिथी देवो भवः’ हें घट मतींत दवरून वागल्यार पर्यटकांकूय बरें आनी आमकांय! ‘इज गोवा सेफ फाॅर टुरिस्ट?’, हो ट्रेंड सोशल मिडियाचेर चालू जालो जाल्यार तें कितल्याक पडटलें, हाचो विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
