भांगरभूंय | प्रतिनिधी
गोंय पंगडाक रणजी करंड क्रिकेट मॅचींत छत्तीसगड पंगडान 8 विकेटींनी हारयलो. शहीद वीर नारायण सिंग आंतरराष्ट्रीय स्टेडियमाचेर जाल्ले मॅचींत सुरवातीच्या बॅट्समनांक दोनूय डावांनी अपेस आयिल्ल्यान गोंयाक हार घेवची पडली.
छत्तीसगडान पयल्या डावांत 9 विकेटी वगडावन 531 धांवड्यो केल्ल्यो, ताका जाप दितना गोंय पंगडान 359 धांवड्यां मेरेन मजल मारिल्ली. गोंया वतीन स्नेहल कवठणकारान 193 बॉलांनी 17 चवके आनी एक सक्याचे मजतीन नाबाद 147 धांवड्यो केल्यो. इशानान लेगीत आपलो फॉर्म कायम राखतना 127 बॉलांनी णव चवके आनी एक सक्याचे मजतीन 80 धांवड्यो केल्यो. छत्तीसगडाच्या रवी किरण आनी शुभम अगरवाल हांणी तीन जाल्यार अजय मंडल आनी वासुदेव बारेथ हांणी दरेकी दोन विकेटी घेतल्यो.
गोंय पयल्या डावांत 172 धांवड्यांनी फाटीं उरलो. छत्तीसगडान फॉलोऑन दिल्या उपरांत गोंयचो दुसरो डाव 223 धांवड्यांचेर सोंपलो. गोंया वतीन परतून एकदा इशानान 139 धांवड्यांनी पांच चवके आनी एका सक्याचे मजतीन 59 धांवड्यांची खेळी केली.
पयल्या डावांत शेंकडो मारपी स्नेहल कवठणकार, सुयश प्रभुदेसाय, मंथन खुटकार आनी दीपराज गांवकार चड वगत खेळपट्टीचेर तग धरपाक शकले नात.
सकयल्या सुवाता वयल्या बॅट्समनांनी केल्ल्या प्रतिकाराक लागून गोंयाची डावान हार वाटावली. दर्शन आनी अर्जुन तेंडुलकर हांणी 75 बॉलांनी 28 आनी उपरांत दर्शन आनी मोहित रेडकार हांणी 99 बॉलांनी 48 धांवड्यांची भागिदारी केली. ते दोगूय नवीन बॉल घेतल्या उपरांत बाद जाले. विजेश प्रभुदेसाय आनी लक्ष्य गर्ग हांणी लेगीत डाव लांबोवपाचो यत्न केलो.
छत्तीसगडा वतीन अजय मंडल आनी रवी किरण हांणी दरेकी 3, वासुदेव बारेथ आनी शुभम अगरवाल हांणी दरेकी दोन विकेटी घेतल्यो.
छत्तीसगडाक जैता खातीर स ओव्हरींनी 52 धांवड्यांची गरज आशिल्ली. एक बॉल आनी आठ विकेटी राखून तांणी जैत जोडलें. गोंया खातीर दोनूय विकेटी विजेशान घेतल्यो.
सी गटांतल्यान कर्नाटक (35 गूण) आनी झारखंड (23 गूण) हे सेमी फायनली खातीर पात्र थारले. ह्या गटांत केरळाचे 21, राजस्थानाचे 20, छत्तीसगडाचे 19, गोंयचे 18, सेनादळाचे 13 आनी पुडुचेरीचे 9 गूण जाले.
थोडे भितर धांवतकटोः छत्तीसगड (पयलो डाव) 9 बाद 531 डाव घोशीत, गोंय (पयलो डाव) 92.5 ओव्हरींनी सगले बाद 359 धांवड्यो (मंथन खुटकार 1, इशान गडेकार 80, सुयश प्रभुदेसाय 22, स्नेहल कवठणकार नाबाद 147, दीपराज गांवकार 32, एकनाथ केरकार 6, दर्शन मिशाळ 17, मोहित रेडकार 4, अर्जुन रेडकार 32, लक्ष्य गर्ग 0, विजेश प्रभुदेसाय 4 धांवड्यो, अजय मंडल 2-69, रवी किरण 3-66, वासुदेव बारेथ 2-77, शुभम अगरवाल 2-111), गोंय (दुसरो डाव) 86 ओव्हरींनी सगले बाद 223 धांवड्यो (स्नेहल कवठणकार 5, इशान गडेकार 59, सुयश प्रभुदेसाय 9, मंथन खुटकार 15, दीपराज गांवकार 0, एकनाथ केरकार 23, दर्शन मिशाळ 35, अर्जुन तेंडुलकर 13, मोहित रेडकार 35, लक्ष्य गर्ग 7, विजेश प्रभुदेसाय नाबाद 4 धांवड्यो, अजय मंडल 3-61, वासुदेव बारेथ 2-64, रवी किरण 3-12, शुभम अगरवाल 2-56), छत्तीसगड (दुसरो डाव) 2 बाद 55 धांवड्यो (शशांक चंद्राकर 2, शशांक सिंग 23, अजय मंडल नाबाद 10, अमनदीप खरे नाबाद 14 धांवड्यो, विजेश प्रभुदेसाय 2-25).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
