भांगरभूंय | प्रतिनिधी
समील वळयवकार, मारियानो रॉड्रिगीश टीएमसीचे राज्य जोड निमंत्रक
पणजी: तृणमूल काँग्रेस (टीएमसी) पक्षाच्या गोंय राज्य समितीची घोशणा काल (बुधवारा) केली. समील वळवयकार आनी मारियानो रॉड्रिगीश हांची वळेरेन उत्तर आनी दक्षीण जिल्ह्या खातीर राज्य जोड निमंत्रक म्हूण नेमणूक जाली. पक्षाचें गोंय प्रभारी किर्ती आझाद हांणी पणजेंतल्या पक्ष कचेरेंत आयोजीत केल्ले पत्रकार परिशदेंत ही म्हायती दिली.
राजेंद्र काकोडकार उत्तर जिल्हो तशेंच जॉर्सन फर्नांडीस दक्षीण जिल्हो अध्यक्ष म्हूण काम पळयतले. कांता गावडे उत्तर जाल्यार शिवदास नायक दक्षीण जिल्हो उपाध्यक्ष म्हूण काम करतले अशें आझाद हांणी सांगलें.
राज्य समितींत अध्यक्ष, उपाध्यक्ष हांचे सयत 10 सरचिटणीस आनी 5 सचिवांचो आस्पाव आसा. हाचे बगर बायलांचे समितींत अविता बांदोडकार आनी प्रतिभा बोरकार मुखेल भुमिका वठयतल्यो. युवा समितीचे समन्वयक म्हूण अँथनी पिक्सोतो काम पळयतले. माध्यम समितीचे समन्वयक म्हूण ट्रॉजन डिमेलो, आयटी खातीर तनोज अडवलपालकार काम पळयतले अशें आझाद हांणी सांगलें.
सुलतान शेख अल्पसंख्याकां खातीर, शंकर मांद्रेंकार अनुसुचीत जाती, जमातीं खातीर आनंद नायक हेर मागासवर्गियां खातीर मुखेली म्हूण काम करतले. तशेंच वांगडी नोंदणे खातीर सिद्धेश्वर मिश्रा फुडारपण करतले अशें किर्ती आझाद हांणी सांगलें. सगल्या समित्यांनी मेळून 9 बायलां आसात. हें प्रमाण 33 टक्के आसा.
वाडटी म्हारगाय, बेरोजगारी ह्या लोकांक सतावपी समस्यांचेर पक्षाचे फुडारी प्रस्न उपस्थीत करतले आनी लोकांच्यो समस्या मांडून त्यो सोडोवपाचो यत्न करतले अशी म्हायती आझाद हांणी दिली. पत्रकार परिशदेक तांचे सयत समील वळवयकार, मारियानो रॉड्रिगीश हाजीर आशिल्ले.
लुईझीन फालैरो विशीं उलोवपाचें टाळ्ळें
टीएमसीची गोंयांत स्थापणूक करपी लुईझीन फालैरो समितींत खंयच दिसनात? असो प्रस्न विचारलो तेन्ना किर्ती आझाद हांणी वळेरेंत आशिल्ल्या लोकां विशींच उलोवपाक हांव हांगा आयलां. फालैरो हांकां राष्ट्रीय उपाध्यक्षपदा वयल्यान काडिल्ल्याचें किर्ती आझाद हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
