भांगरभूंय | प्रतिनिधी
सुहेल शेख हाचो पत्रकार परिशदेंत गंभीर आरोप
भांगरभूंय । प्रतिनिधी
सांगें: फाटल्या 20 वर्सां सावन गोंय आयडीसी कडल्यान आपली गरजेभायर सतावणूक चल्ल्या. हाचो परिणाम आपल्या कुटुंबाचेर जाता. कुटुंबांतल्या सगळ्याच वांगड्यांक हाचो त्रास सोंसचो पडटा, अशें सांगेंचे वेवसायीक सुहेल शेख हांणी पत्रकार परिशदेंत सांगलें.
1999त आयडीसीन आपल्या कडल्यान 1 लाख 16 हजार 850 चौखण मिटर जमीन फक्त 9 लाखांक विकत घेतिल्ली. पूण आतां नकाशाचेर 1 लाख 22 हजार 952 चौ. मि. अशी दाखयता. म्हणल्यार 6 हजार चौ. मि. चड दाखयता. ती 6 हजार चौ. मि. जमीन आपली आसा. आयडीसीन ती जमीन आपल्या पोजिशनांत घेवन आपली मुख्य जमीन विकता आनी बेकोयदो तरेन आपले जमनीचेर हक्क सांगता. जेन्न 1999त जमीन संपादीक केल्ली तेनना आमी सांगिल्लें, फुडली जमीन संपादीक करपाचे आसत जाल्यार फाटले जमनीचेर अॅक्सेस दिवचो, पूण आयज मेरेन अॅक्सेस करपाक नाहरकत दाखलो दिवंक ना. आपले सुवातेंत आपणे रस्तो बांदलो त्या वेळार आपल्यचेर एफआयआर दाखल केली. आपले जमनींत वचपा खातीर आपणे रस्तो केलो जाल्यार एफआयआर कित्या खातीर असो प्रस्न सुहेल हांणी उपस्थीत केलो.
वीज कनेक्शना खातीर वीज खांबे, तशेंच उदक कनेक्शना खातीर नाहरकत घेवपाक आयडीसीन सांगलें. ते प्रमाण आपणे नाहरकत दाखलो मागलो, पूण परवानो दिवंक ना. 1999त आपल्या फक्त 9 लाख रुपया मेळिल्ले. आतां आयडीसी आपले कडेन उदक आनी वीज कनेक्शना खातीर साडे स लाख रुपया मागता. जमीन आपली आसतना आपणे कित्याक म्हूण पयशे दिवपाचे, असोय प्रस्न सुहेल हांणी उपस्थीत केलो.
आपणे फेरसर्वेक्षणा खातीर जिल्होधिकाऱ्यांक अर्ज केल्लो. पूण तांणी ती फायल केपें उपजिल्होधिकाऱ्या कडेन धाडली. आनी आतां केपेंच्या सांगें उपजिल्होधिकाऱ्या कडेन पावल्या. तांणी ती फायल पळय़ली आनी ऑर्डर पास केली. फेरसर्वेक्षण केले उपरांत 6 हजार चौ. मि. जमीन चड आसिल्ल्याचें दिसलें, अशें सुहेल हांणी सांगलें.
हे जमनी विशीं उपजिल्होधिकाऱ्या कडेन कागाळ आसा. उपजिल्होधिकाऱ्या कडल्यान आपल्याक न्याय मेळना जाल्यार फाटल्या 23 वर्सांची लुकसाण भरपाय व्याजा सयत दिवची, हे खातीर आपूण उच्च न्यायालयांत वतलो, अशें सुहेल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
