गोंय आनी प्रवाहाच्या संमती बगर कर्नाटकाच्या प्रकल्पांक मान्यताय मेळची ना

भांगरभूंय | प्रतिनिधी

पणजी, प्रतिनिधी: गोंय सरकार आनी प्रवाह समितीचे मान्यताये बगर म्हादयवेल्या कर्नाटकाच्या खंयच्याच प्रकल्पाक मान्यताय मेळची ना, अशें मुख्यमंत्री डॉ. प्रमोद सावंत हांणी स्पश्ट केलां. म्हादय प्रस्नाचेर उदका पुरवण खाते केंद्र सरकारा कडेन फाटपुरवण करीत आसा. प्रवाह समितीन कणकुंबी भेट दिवन कर्नाटका कडल्यान उदक घुंडावपा खातीर सुरू आशिल्ल्या यत्नाची पळोवणी केल्या. प्रवाह समिती वस्तुनिश्ट अहवाल केंद्र तशेंच न्यायालयाक सादर करतली. हाका लागून गोंयची बाजू सामकी घटमुट आसा, असो दावो डॉ. सावंत हांणी केलो.
मंत्रिमंडळ बसके उपरांत पत्रकार परिशदेंत उलयताना मुख्यमंत्र्यांन ही म्हायती दिली. प्रवाह समितीची बसका बंगळुरुंत जाली. हे बसकेक गोंयचे 3 जाल्यार कर्नाटकाचे 30 अधिकारी उपस्थित आशिल्ले. 30 अधिकाऱ्यां मुखार 3 अधिकाऱ्यांचे निभाव कसो लागतलो? अशी टीका विरोधकांनी केल्या.
बसका बंगळुरात जाल्ली. हाका लागून कर्नाटकाचे 30 अधिकारी उपस्थित आशिल्ले. अधिकाऱ्यांच्या आंकड्याचो कसलोच परिणाम जावचो ना. जे सुवातेर उदक घुंडावयाचे यत्न कर्नाटक करता, ते सुवातेची पळोवणी प्रवाह समितीन केल्या. प्रवाह समिती ही स्वतंत्र समिती आसा. हाका लागून प्रवाहान केल्या पळोवणीन गोंयची बाजू घटमुट जाल्या. हांव मुख्यमंत्री जाल्या उपरांत सर्वोच्च न्यायालयात नव्यान आव्हान याचिका दाखल जाली. प्रशासकी आनी कायदेशीरदृश्ट्या गोंयची बाजू घटमुट आसा, अशें मुख्यमंत्र्यांन सांगले.

म्हादय प्रस्नाचेर आंदोलन करताना कर्नाटकात काय कार्यकर्ते कदंबा बशींचेर चडले. बशींची नासधूस जावंक ना. तरी सुद्दा ही घडणूक गंभीर आसा. हे विशीं राज्यान केंद्र सरकाराक कळयलां. राज्याचे मुखेल सचिव आनी पुलीस म्हासंचालक कर्नाटकाच्या मुखेल सचिवां कडेन उलोवन अहवाल सादर करतले. सरकारान हे घडणुकेचेर अहवाल मागला.

राष्ट्रीय म्हामार्गाचेर मागलो अहवाल
पालसणां कोसळपाच्या घडणुकांक लागून दिसांन दीस राष्टीय म्हामार्ग धोकादायक जायत आसा. खबरदारीचो उपाय म्हूण न्हंयबाग – पेडणें राष्ट्रीय म्हामार्ग बंद दवरला. जिल्होधिकाऱ्यां कडेन सरकारान अहवाल मागला. अहवाला उपरांत कंत्राटदाराचेर खर कारवाय जातली, अशें मुख्यमंत्र्यांन सांगलें.