भांगरभूंय | प्रतिनिधी
कर्नाटक अबकारी खात्याची कारवाय
काणकोण: कर्नाटकाच्या अबकारी खात्यान गोंय सावन कर्नाटकात बेकायदाे सोरो घेवन वचपी टँकर माजाळी चेक नाक्यार ताब्यात घेतलो. ह्या टँकरींत 1 लाखाचो विदेशी बनावटीचो देशी सोरो आशिल्लो. अबकारी खात्यान टँकरीचो चालक तशेच टॅंकर ताब्यांत घेतला.
गोंय सावन कर्नाटकांत बेकायदाे सोऱ्याच्या येरादारीची खूबशीं प्रकरणां जाल्यांत. शिमेर खूबशा जाणांक अटक लेगीत जाल्या. माजाळी चेक नाक्यार अबकारी खात्याचो उपनिरीक्षक एम एम नायक हांकां टँकरीची म्हायती मेळ्ळी. तांणी सतर्कताय बाळगून माजाळी चेक नाक्यार टँकर आडायलो. ही कारवाय फांतोडेर 2 वरांचेर जाली.
टँकरींत सोऱ्याच्यो 111 बाटल्यो आशिल्ल्यो. हाे सोरो 83.250 लिटर जाता. टँकरीचो चालक चवकशे खातीर ताब्यांत घेतला. ह्या टँकराची नोंदणी कर्नाटकाची आसा. कर्नाटकाचे पुलीस आनी अबकारी खातें तपास करतात. हो सोरो गोंय सावन कर्नाटकांत व्हरता आसतना कारवाय जाली. पोळें चेक नाक्या सावन लागींच कर्नाटकांतल्या माजाळी चेक नाक्यार हो टँकर धरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
