भांगरभूंय | प्रतिनिधी
राज्यपाल राजेंद्र आर्लेकारः प्राकृतीक शेती विशींचे पेडण्यां कार्यशाळेचें उक्तावण
भांगरभूंय । प्रतिनिधी
पेडणें: गोंयांत शेती खातीर पूरक वातावरण आसून लेगीत आमी शेती करिनात, अशें कांय जाण म्हणटात. पूण प्रत्यक्षांत शेतकारांचो प्राकृतीक शेती करपाचेर भर आसा. ह्या शेतकारांक उर्बा दिवचे खातीर हिमाचल प्रदेशांतल्या डॉ. यशवंतसिंग परमल कृशी विद्यापीठ आनी वझरेचें शारदा उच्च माध्यमीक विद्यालय हांचे मदीं प्राकृतीक शेती विशीं मार्गदर्शन करपाक कबलात जाल्या. हे कबलातीचो पेडणेंच्या शेतकारां जातलो आनी तांचो अर्थीक दर्जो वाडटलो. फुडारांत गोंयाक प्राकृतीक शेती खातीर वळख मेळटली, अशें हिमाचल प्रदेशाचे राज्यपाल राजेंद्र आर्लेकार हांणी सांगलें.
शारदा उच्च माध्यमीक विद्यालय आनी डॉ. यशवंतसिंग परमल कृशी विद्यापीठ हांच्या जोडपालवान आयोजीत केल्ले प्राकृतीक शेती कार्यशाळेचें उक्तावण केले उपरांत आर्लेकार मुखेल सोयरे म्हूण उलयताले. तांचे वांगडा माचयेर डॉ. यशवंतसिंग परमल कृशी विद्यापीठाचे कुलगुरू डॉ. राजेश्वर चंदलजी, आमदार प्रेमेंद्र शेट, डॉ. राजेंद्र भट, पोरणें गोंयच्या कृशी विभागाचे संचालक प्रवीण कुमार, आदले जिल्हो पंचायत वांगडी प्रताप भेंडाळकार, श्रीधर शेणवी देसाय, प्राचार्य गजानन मराठे, पालक शिक्षक संघाची अध्यक्ष संगिता गांवकार हाजीर आशिल्ली.
भारत हो कृशीप्रधान देश. शेतकारांक शेतां कसपाक सारें आनी हेर कारणां खातीर खूब खर्च येता. हो खर्च उणो जावचो आनी शेतकारांचें उत्पन्न दुपेट करचे खातीर प्रधानमंत्री नरेंद्र मोदी हांणी देशभरांत 2018 त शेतकारांनी प्राकृतीक शेती करची हे खातीर मोहीम सुरू केली आनी ताची सुरवात हिमाचल प्रदेशांतल्यान जाली. डॉ. यशवंतसिंग परमार कृशी विद्यापिठाचे कुलगुरू डॉ. राजेश्वर चंदेलजी हे ह्या विशयाचे तज्ञ. ते प्रधानमंत्र्यांक कृशी विशीचें धोरण थारायतना जें सल्लागार मंडळ आसा, तातूंत तांचो आस्पाव आसा. तांचो गोंया खातीर मार्गदर्शक म्हूण निश्चीत फायदो जातलो. ताचो लाव पेडणेंच्या शेतकारांनी घेवचो, अशें राज्यपाल आर्लेकार हांणी सांगलें.
प्रास्तावीक करतना प्राचार्य गजानन मराठे हांणी सांगलें, शारदा उच्च माध्यमीक विद्यालय आनी परमार कृशी विद्यापीठ हांचे मदीं कृशी धोरण फुडें व्हरपा खातीर जावपी कबलात हो दीस विद्यालयाच्या इतिहासांतलो भांगराचो दीस थारतलो. प्राकृतीक शेती करचे खातीर शारदा विद्यालया वतीन विवीध उपक्रम आनी प्रशिक्षण वर्ग सुरू करून सैमीक शेती कशी करची हे विशीं धडे दितले. भारताक सुजलान सुफलाम करचे खातीर आमी सगळ्यांनी आदार करुंया, अशें मराठे हांणी सांगलें.
कार्यावळीक पेडणें म्हाल अधिकारी प्रकाश रावत, पणजी कृशी कार्यालयाचे अधिकारी प्रसाद परब, पेडणें म्हालांतले प्रगतशील शेतकार उदय प्रभुदेसाय, दिलीप नारुलकार, प्रवीण तिळवे, श्रीराम साळगांवकार, नारायण नायक, प्रमोद महाले, प्रतिना साळगांवकार, चांदेल- हसापूरचे सरपंच तुळशीदास गांवस हाजीर राविल्ले. वृंदन परबान सुत्रसंचालन केलें जाल्यार संपदा परब हांणी उपकार मानले.
‘शारदा विद्यालयांत सुरू करतले डिप्लोमा कोर्स’
पेडणें म्हालांतले जे विद्यार्थी धावी- बारावी पास जातात तांकां जर शेतीची आवड आसत जाल्यार तांकां उण्या काळाचे विवीध तरेचें कृशी विशींचें शिक्षण तशेंच रोजगाराच्यो संदी मेळोवन दिवचे खातीर फुडल्या वर्सां सावन शारदा उच्च माध्यमीक विद्यालयांत डिप्लोमा कोर्स सुरू करतले. ही जी कबलात जाल्या तातूंत ताचोय आस्पाव आसतलो, अशें राज्यपाल राजेंद्र आर्लेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
