भांगरभूंय | प्रतिनिधी
भांगरभूंय । प्रतिनिधी
म्हापशेंः भांगराच्यो वस्ती करपी गोंयां भायल्या कारागिराचीं वळखपत्रां तयार करून तांका ती दिवपाचो उपक्रम उत्तर गोंयांतल्या गोंय दैवज्ञ सुवर्णकार कारागीर संघा हातांत घेतला. ह्या कारागिरींची म्हायती आसची आनी तांचेर नियंत्रण आसचें हें खातीर व्हो उपक्रम सुरू केला. संघाचो अध्यक्ष औदूंबर पिंगुळकार, सचीव संजय चोडणकार, जोड सचीव शुभम बेनकार, भांडारी लक्ष्मिकांत शिरोडकार आनी वांगडी वासुदेव शिरोडकार हांणी हीं वळखपत्रां तयार करून ती बंगाली कारागिरांक वितरीत केलीं.
गोंयां भायले कारागीर गोंयांत येतात आनी भांगराच्यो वस्ती तयार करपा खातीर भांगर घेतात आनी फुज्ज्यो काडटात. तांची कसलीच म्हायती आसना. ताका लागून सराफ आनी गिरायकाची लुबाडणूक जाता. हें सगळें थांबोवपा खातीर कारागीर संघान वळखपत्रां दिवपाचो निर्णय घेतला. गोंयां भायल्या कारागिरांचो फोटो आनी तांची सगळी म्हायती संघा कडेन संग्रहीत करून तांची ही वळखपत्रां तयार केल्यांत.
गोंयांत येवपी बंगाली कारागिराचेंर कोणाचें नियंत्रण आसना. किदेंय जाल्यार तांचो सोद घेवप कुस्तार जाता. ते खातीर वळखपत्र उपक्रम आमी हातांत घेतलो. आतां मेरेन सुमार शंबर कारागिरांक वळखपत्रां दिल्यांत अशें पिंगुळकारान सांगलें. उत्तर गोंयांत 250 परस चड गोंयां भायले कारागीर आसात. वळखपत्र नाशिल्ल्या कारागिरा कडल्यान काम करून घेवचे नात अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
