भांगरभूंय | प्रतिनिधी
पडीक जमनी मदीं खाजन शेतीचें प्रमाण चड
भांगरभूंय । प्रतिनिधी
पणजी : गोंयांत 8500 हेक्टर शेती तशेंच बागायतींची जमीन पडीक आसा. शेतकी खात्याच्या गोपां कडल्यान ही म्हायती मेळ्ळ्या. राज्यांत 44 हजार हेक्टर जमीन लागवडी खाला आशिल्याची नोंद शेतकी खात्या कडेन आसा. पडीक जमीन ताब्यांत घेवपा विशीं कायदो करपाचे संकेत उदका पुरवण खात्याचे मंत्री सुभाष शिरोडकार हांणी दिल्यात. हे फाटभुंयेर हो आंकडो म्हत्वाचो थारता.
8500 हेक्टर हो आंकडो व्हड नासलो तरी तो सामकोच आडनदर करपा इतलो ल्हान ना. पडीक जमीन ताब्यांत घेवपाचो कायदो सरकारान केलो जाल्यार सध्याचे घडयेक 8500 हेक्टर शेत जमीन सरकाराच्या ताब्यांत येवप शक्य आसा. पडीक जमीन ही चडशी खाजन शेतीची जमीन आसा.
खूबशे शेतकार जमनी पडीक दवरतात. जमीन पडीक दवरप हो गुन्यांव थारता. हाका लागून पडीक जमीन ताब्यांत घेवपाचो सरकाराचो विचार आसा. हे विशींचो कायदो जावप शक्य आसा, अशें सुभाष शिरोडकार हांणी सांगलां.
पडीक जमनी दवरपाचीं खूबशीं कारणां आसात, अशें शेतकी खात्याचे संचालक नेवील आफोंसो हांणी सांगलें. 8500 हेक्टर पडीक जमनींतली चडशी खाजन जमीन आसा. पावसांत हे जमनीत उदक भरता. उदकाक लागून पिकाची नाशाडी जाता. शेतकारांचें अर्थीक लुकसाण जाता. हे खातीर शेतकार भात रोवपाक सोदिनात. बांद दुरूस्त करपाची गरज आसा. बांद दुरूस्त करपा खातीर निधीची गरज आसा. कुंकळ्ळे भायल्यान मुंडकार येवन शेती करताले. आता ही शेती पडीक आसा. कायदेशीर आडखळींक लागून लेगीत काय कुळांक शेत रोवपाक मेळना. कांय कडेन पावसात उदक भरता. शेत रोयले आनी उदक भरलें जाल्यार खूब लुकसाण जाता. लुकसाणीक लागून शेतकार शेता कसपाक पळयनात. कांय शेतकारांक मानाय मेळपाक आडखळ जाता. शेत पडीक दवरपाची अशीं साबार कारणां आसात, अशें शेतकी संचालकान प्रतिनिधी कडेन उलयतना सांगलें. गोंयांत भाताचें बीं, सारें हाका अनुदान मेळटा. ते भायर उण्या दरांत भाताची विक्री जाली जाल्यार किलोक 20 रुपया आदारभूत मोल मेळटा. हे खातीर खूबशे शेतकार शेत रोयतात. पूण मानायाचो दिसवडो म्हारग आशिल्यान शेती करप परवडना, अशें शेतकी संचालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
