भांगरभूंय | प्रतिनिधी
पयल्या सात म्हयन्यांत 2 लाख 81 हजार विदेशी पर्यटकांची भेट
भांगरभूंय । प्रतिनिधी
पणजी: कोरोना म्हामारी उपरांत गोंयचें पर्यटन उबारी घेता, असो निश्कर्श आंकडेवारीचें प्रमाण पळयल्यार येता. पोरूंचे (2022) तुळेत अंदूं गोंयाक भेट दिवपी विदेशी पर्यटकांचो आंकडो 60.57 टक्क्यांनी वाडला. 2022 त गोंयाक 1 लाख 75 हजार विदेशी पर्यटकांनी भेट दिल्ली. अंदूं पयल्या सात म्हयन्यांत (जुलय मेरेन) 2 लाख 81 हजार विदेशी पर्यटकांनी गोंयाक भेट दिल्या.
खासदार फ्रान्सीस सार्दिन हांणी लोकसभेंत विचारिल्ल्या प्रस्नाचेर केंद्रीय पर्यटन मंत्री जी. किशन रेड्डी हांणी ही लेखी जाप दिल्या.
अंदूं विदेशी पर्यटकांचो आंकडो वाडिल्लो आसलो तरी तो 2018 वा 2019चे तुळेंत उणो आसा. 2020 सावन देशा सयत गोंयांत कोरोना म्हामारी आयली. 2020 ते 2022 ही दोन वर्सां कोरोना म्हामारीचें सावट आशिल्लें. विमान तशेंच रेल्वे सेवा लागीं लागीं बंद आशिल्ली. हाका लागून पर्यटन वेवसाय बंद पडलो. हॉटेल, टॅक्सी वेवसाय ठप्प आशिल्ले. कोरोनाचेर वासीन आयले उपरांत निर्बंध सदळ जावपाक सुरवात जाली. 2022 च्यान विदेशी पर्यटक देशांत येवपाक सुरवात जाली.
2020 आनी 2021 त गोंयांत तशे विदेशी पर्यटक आयलेच ना. 2022 च्यान ते येवपाक लागले. आतां ते वाडपाक लागल्यात. विदेशी पर्यटक वाडपाक लागल्यात तरी लेगीत कोरोना म्हामारी पयलीचो आंकडो पर्यटकांनी मेळोवंक ना.
2018 त गोंयाक 9.34 लाख विदेशी पर्यटकांनी भेट दिल्ली. 2019 त विदेशी पर्यटकांचो आंकडो 9.37 लाखांचेर पावलो. 2020 त मार्चा उपरांत निर्बंधांक सुरवात जाली. कोरोना म्हामारी आदीं 3.03 लाख विदेशी पर्यटकांनी गोंयाक भेट दिल्ली. 2021 त 0.22 लाख पर्यटकांनी भेट दिल्ली. अशी आंकडेवारी लोकसभेंत सादर जाल्या. विदेशी पर्यटकांचो आंकडो वाडचो म्हूण केंद्र सरकार तशेंच गोंय सरकार यत्न करता. कोरोना म्हामारी वेळार पर्यटन वेवसाय बंद आशिल्लो. हाका लागून हॉटेलांक जीएसटी तशेंच हेर शुल्कांत सवलत दिली. आतां पर्यटन वाडपा खातीर उपाय येवजण्यो सुरू जाल्यात. विदेशांत जायरातबाजी करपा सयत रोड शो लेगीत जाल्यात. ‘प्रसाद’ तशेंच हेर तरेकवार येवजणेंच्या आदारान पर्यटन थळांची उदरगत गोंयात चालू आसा, अशी म्हायती केंद्रीय मंत्र्यांनी दिली.
वर्स आनी विदेशी पर्यटकां आंकडो (लाखांनी)
2018- 9.34, 2019- 9.37, 2020- 3.03, 2021- 0.22, 2022- 1.75, 2023- 2.81 (जुलय मेरेन)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
