भांगरभूंय | प्रतिनिधी
सर्गेस्त भाऊसायब बांदोडकारांच्या कारकिर्दींत सुरू जाल्ली पक्षांतरां; पयलीं मगोक आतां काँग्रेसीक बसता फटको
भांगरभूंय I प्रतिनिधी
पणजी : काँग्रेसच्या आठ आमदारांनी बुधवारा भाजपांत प्रवेश करून राज्यांतलीं पक्षांतराचीं परंपरा कायम दवरल्या. पक्षांतरांक लागून गोंयची बरीच बदनामी जाल्या. वेंचणुके पयलीं जाहीर सोपूत घेतिल्या उमेदवारांनी वेंचून आयले उपरांत भाजपांत प्रवेश केलो.
आठ आमदारांचो भाजप प्रवेश हे राज्यांतले पयलेच पक्षांतर न्हय. तशेंच हे पक्षांतर निमणे थारतले, अशेंय म्हणप शक्य जावचे ना. वेंचणुके पयलीं आमदारकीचो राजिनामो दिवन बऱ्याच जाणांनी दुसऱ्या पक्षांत प्रवेश करून उमेदवारी मेळयली. हातूंत रवी नायक, जयेश साळगावकार, मायकल लोबो हांचो आस्पाव आसा. आमदारकीचो राजिनामो दिवन ते दुसऱ्या पक्षाच्या उमेदवारीचेर वेंचून आयलें. हाका लागून तांचें पक्षांतर म्हणपाक येवचें ना.
डॉ. प्रमोद सावंत मुख्यमंत्री जाले उपरांत चंद्रकांत कवळेंकार हांच्या फुडारपणा खाला काँग्रेसीच्या धा आमदारांनी भाजपांत प्रवेश केल्लो. हाचे उपरांत जाल्ले हे सगल्यांत व्हड पक्षांतर आसा. तेन्ना विरोधी पक्ष फुडारी चंद्रकांत कवळेंकार हेच भाजपांत गेल्ले. आतां आदले विरोधी पक्ष फुडारी मायकल लोबो आनी दिगंबर कामत हे दोगूय जाण भाजपांत गेल्यात.
पक्षांतर बंदी कायद्यांत बदल जाले उपरांत लेगीत पक्षांतरां बंद जावंक ना. गोंय मुक्ती उपरांत भाऊसायब बांदोडकार मुख्यमंत्री जाले. बांदोडकार मुख्यमंत्री आसतना 1967 वर्सा के. बी. नायक हांच्या फुडारपणा खाला महाराष्ट्रवादी गोमंतक पक्षाच्या (मगो) चार आमदारांनी वेगळो गट स्थापन केल्लो. पूण युगोत फूट पडिल्ल्यान भाऊसायब बांदोडकार हांचें सरकार तिगलें. गोंयांत जाल्ले हे पयलें पक्षांतर. हाचे उपरांत 1977 वर्सा तेन्नाचे मुख्यमंत्री सर्गेस्त शशिकला काकोडकार (ताई) हांच्या नेतृत्वा आड तीन आमदारांनी बंड केले. दयानंद नार्वेकार, दिलखूश देसाय, शंकर लाड हांणी मगो पक्ष सोडून काँग्रेस पक्षांत प्रवेश केलो. ह्या पक्षांतराक लागून ताईचें सरकार कोसळ्ळें.
1990 वर्सा प्रतापसिंह राणे हांच्या सरकारांतल्या काँग्रेसीच्या सात आमदारांनी काँग्रेस सोडून गोवन पिपल्स पक्षाची स्थापणूक केली. प्रतापसिंह राणे हांचें सरकार कोसळ्ळें आनी चर्चील आलेमांव मुख्यमंत्री जाले. 1989 ते 1994 ह्या काळांत बरीच पक्षांतरां जालीं. 1991 वर्सा रवी नायक हांच्या फुडारपणा खाला सात आमदारांनी मगो सोडून काँग्रेसींत प्रवेश केलो. ह्या पक्षांतराक लागून रवी नायक मुख्यमंत्री जाले.
1994च्या विधानसभा वेंचणुके उपरांत मगोच्या चार आमदारांनी काँग्रेसींत प्रवेश केलो. ह्या पक्षांतराक लागून प्रतापसिंह राणे सरकाराक भोवमत सिद्ध करप शक्य जालें. 1998 वर्सा डॉ. विल्फ्रेड डिसोझा हांच्या फुडारपणा खाला काँग्रेसीच्या 10 आमदारांनी काँग्रेसीक सोडचीट दिवन राजीव काँग्रेस पक्षाची स्थापणूक केली. ह्या पक्षांतराक लागून प्रतापसिंह राणे हांचें सरकार कोसळ्ळें. चार म्हयन्यांनी राजीव काँग्रेसीत फूट पडली. कांय आमदारांनी परतून काँग्रेसींत प्रवेश केलो आनी लुईझीन फालेरो मुख्यमंत्री जाले.
1999 वर्सा जाल्ले विधानसभा वेंचणुके उपरांत फ्रांसीस सार्दीन हांच्या फुडारपणा खाला काँग्रेसीच्या 10 आमदारांनी पक्ष सोडलो आनी स्वतंत्र पक्ष स्थापन केलो. ह्या पक्षांतराक लागून फ्रांसीस सार्दीन मुख्यमंत्री जाले. ऑक्टोबर 2000 वर्सा रवी नायक हांच्या फुडारपणा खाला काँग्रेसीच्या आमदारांनी भाजपांत प्रवेश केलो. ह्या पक्षांतरा उपरांत भाजपाचे मनोहर पर्रीकार मुख्यमंत्री जाले.
2017 चे वेंचणुके उपरांत 2019 वर्सा दयानंद सोपटे, सुभाष शिरोडकार , बाबूश मोन्सेरात हांणी आमदारकेचो राजिनामो दिवन भाजपांत प्रवेश केलो. डॉ. प्रमोद सावंत मुख्यमंत्री जाले उपरांत सगल्यांत पयलीं मगोचे मनोहर आजगांवकार आनी दीपक प्रभू पाऊसकार हांणी भाजपांत प्रवेश केलो. उपरांत जून म्हयन्यांत काँग्रेसीच्या 10 आमदारांनी गट स्थापन करून भाजपांत विलीन केलो. आतां तीन वर्सां उपरांत काँग्रेसीच्या 8 आमदारांनी वेगळो गट करून पक्षांतर केलां.
कायद्यांत बदल जावनूय पक्षांतर चालूच
2002च्या वेंचणुके उपरांत मगोचे पांडुरंग मडकयकार आनी युजीडीपीचे बाबूश मोन्सेरात हांणी भाजपांत प्रवेश केलो. हाचे उपरांत पक्षांतर बंदी कायद्यांत बदल जालो. एक तृतीयांश आमदारांक वेगळो गट करपाची मेकळीक आसली. हातूंत बदल जावन ती दोन तृतीयांश केली. हाका लागून कांय तेप पक्षांतरां उणीं जालीं. आमदार राजिनामो दिवन दुसऱ्या पक्षांत प्रवेश करप चालूच उरले. बाबूश मोन्सेरात, मिकी पाशेको, इजिदोर फर्नांडीस, पांडुरंग मडकयकार, दिगंबर कामत हांणी आमदारकीचो राजिनामो दिवन काँग्रेसींत प्रवेश केलो. 2007च्या वेंचणुके उपरांत चर्चील आलेमांव हांणी सेव्ह गोवा फ्रंट हो पक्ष काँग्रेसींत विलीन केलो. चर्चील आनी आलेक्स रेजिनाल्ड हांणी हे पक्षांतर केल्ले. उपरांत बरोच तेप पक्षांतरां जालीं ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
