गोंयांत साधनसुविधांचो मोट्या प्रमाणांत विकास

भांगरभूंय | प्रतिनिधी

निलेश काब्राल ः दाबोळे गरीब कल्याण संमेलन दबाज्यान
भांगरभूंय प्रतिनिधी
वास्को ः प्रधानमंत्री आवास योजने अंतर्गतक देशांतल्या 32 हजार गांवांतलो वीज आनी उदकाचो प्रस्न सोडोवपाक प्रधानमंत्री नरेंद्र मोदी हांणी फुडाकार घेतला. गोंयांत साधनसुविधांचो मोट्या प्रमाणांत विकास जाता अशें भौशीक बांदकाम मंत्री निलेश काब्राल हांणी सांगलें.
प्रधानमंत्री नरेंद्र मोदी हांच्या कार्यकाळाक आठ वर्सां पूर्ण जाल्ल्यान भाजपा दाबोळी मंडळान दाबोऴे घडोवन हाडिल्ल्या गरीब कल्याण संमेलनांत निलेश काब्राल उलयताले. ह्या वेळार दाबोळेचे आमदार आनी येरादारी मंत्री माॅविन गुदिन्हो, राज्य अनिवासी भारतीय वेव्हार आयुक्त आनी आदले खासदार नरेंद्र सावयकार, आदले आमदार दामू नायक, जिल्हो पंचायत वांगडी अनिता थोरात, चिखलीचे उपसरपंच कमलाप्रसाद यादव, पंच शिवाजी कुराडे, बोगमाळोची सरपंच लाॅरेन डिकुन्हा, उपसरपंच संकल्प महाले, पंच लक्ष्मण कवळेकार, अरूण नायक, दाबोळी भाजप गटाध्यक्ष संदीप सूद, नगरसेवक विनोद किनळेकार, लिओ राॅड्रिगीस आनी हेर मानेस्त हाजीर आसले.
प्रधानमंत्री नरेंद्र मोदी हांणी आपलें कार्य राष्ट्रहिता खातीर पुराय संवसारांत नांव मेळयलां. तांच्या दूरदृश्टी फुडारपणाक लागून देश विकासाच्या मार्गान वता अशें माॅविन गुदिन्हो हांणी सांगलें. गोंयांत जावपी विकास मोदी हांच्या मार्गदर्शना खाला सुरू आसा अशें तांणी सांगलें.
सेवा, सुशासन, गरीब कल्याण कार्यावळींतल्यान नागरिकांक मोदी हांणी केल्ल्या कार्याची माहिती दिवप हें दरेकाचें कर्तव्य. बायलांक स्वावलंबी करपा खातीर भाजपा पावलीं मारता अशें तांणी सांगलें.
प्रधानमंत्री मोदी हांणी युक्रेन-रशिया झुजांत अडकल्ल्या भारतियांक देशांत हाडपा खातीर म्हत्वाची भुमिका केल्या. भाजपा सरकार सामान्य लोकांचें आशिल्ल्यान दरेकाक कोवीड लसीकरण फुकट दिलें अशें नरेंद्र सावयकार हांणी सांगलें.
संदीप सूद हांणी येवकार दिलो. प्रकाश गांवस हांणी कार्यावळीचें सुत्रसंचालन केलें. विनोद किनळेकार हांणी उपकार मानले.