भांगरभूंय | प्रतिनिधी
गोंय नं. 1; सगल्यांत उणी सरासरी मेघालयाची
भांगरभूंय । पिनाक कल्लोळी
पणजीः गोंयांतल्या विवीध शाळांच्या वाचपघरांनी तशेंच बूक बँकेंत 39 लाख 45 हजार 645 पुस्तकां आसात. गोंयांत वट्ट 1,510 शाळा आसात. दरेके शाळेंत सरासरी 2,613 पुस्तकां उपलब्ध आसात. सरासरी पुस्तकां चड आशिल्ल्या राज्यांचे वळेरेंत गोंय देशांत पयल्या नंबरार आसा. केंद्रीय शिक्षण खात्याच्या ‘युनिफायड डिस्ट्रिक्ट इन्फॉर्मेशन सिस्टम फॉर एज्युकेशन प्लस (यूडीआयएसई) 2022च्या अहवालांतल्यान ही म्हायती मेळ्ळ्या.
हे वळेरेंत केरळ दुसऱ्या नंबराचेर आसा. थंयच्या शाळांनी सरासरी 2,580 पुस्तकां आसात. ते उपरांत हरियाणा (1,982), कर्नाटक (1,547), पंजाब (1,509), तामीळनाडू (1,270), महाराष्ट्र (1,128), गुजरात (1,096), ओडिशा (788) हांचो नंबर लागता. अहवाला प्रमाण पुराय देशांतल्या शाळांनी 106 कोटीं परस अदीक पुस्तकां आसात.
केंद्रशासीत प्रदेशांत चंदिगड सगळ्यांत मुखार आसा. थंय दरेके शाळेंत सरासरी 8,524 पुस्तकां आसात. ते उपरांत दिल्ली (5,676), अंदमान निकोबार (4,279), लक्षद्वीप (3,453), पद्दुचेरी (3,373), दादरा आनी नगर हवेली (1,676) ह्या केंद्रशासीत प्रदेशाचो नंबल लागता. देशांत सगल्यांत उणी सरासरी मेघालयाची आसा. थंय दर शाळेंत फक्त 95 पुस्तकां आसात.
अहवाला प्रमाण गोंयांतल्या 1,510त 814 सरकारी, 557 अनुदानीत आनी 139 खाजगी विनाअमुदानीत शाळांचो आस्पाव आसा. सरकारी तशेंच विनाअनुदानीत मेळून 973 शाळांनी वाचपघराची वा बूक बँकेची वेवस्था आसा. अनुदानीत 557 तल्या 553 शाळांनी वाचपघरां आसात. 1,510तल्या 1,506 शाळांनी ही वेवस्था आसा.
फक्त 22 शाळांनी डिजिटल वाचपघरां
गोंयांतल्या 1,510 तल्या फक्त 22 शाळांनी डिजिटल वाचपघरांची वेवस्था आसा. तातूंत सरकारी 3, अनुदानीत 13 जाल्यार खाजगी विनाअनुदानीत 6 शाळांचो आस्पाव आसा. हें प्रमाण 4.9 टक्के इतलें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
