गोंयांत राजधानी पणजे लॉजिस्टीक पार्क

भांगरभूंय | प्रतिनिधी

दोन वर्सांत प्रकल्पाचें काम जातलें पुराय, केंद्रीय मंत्री गडकरींची लोकसभेंत म्हायती

भांगरभूंय I प्रतिनिधी
पणजी : केंद्रीय रस्ते आनी म्हामार्ग मंत्रालयान गोंया खातीर मंजूर केल्लो ‘लॉजिस्टीक पार्क’ राजधानी पणजेंत उबारतले. ह्या प्रकल्पाचें काम फुडल्या दोन वर्सांत पुराय जातलें, अशी म्हायती केंद्रीय रस्ते आनी येरादारी मंत्री नितीन गडकरी हांणी लोकसभेंतल्या लेखी प्रस्नाच्या जापेंत दिली.
गोंया सयत दिल्ली, महाराष्ट्र, आसाम, गुजरात, तेलंगण, पंजाब, राजस्थान, आंध्र प्रदेश, तामिळनाडू, मध्य प्रदेश, अस्तंत बंगाल, कर्नाटक, ओडिशा, आसाम, हरियाणा, हिमाचल प्रदेश आनी केरळ ह्या राज्यांनी ‘भारतमाला परियेवजणे’ खाला फुडल्या दोन वर्सांत 35 लॉजिस्टीक पार्क उबारपाचें लक्ष्य केंद्रीय रस्ते आनी म्हामार्ग मंत्रालयान दवरलां.
लॉजिस्टीक पार्क खातीर मंत्रालयान राष्ट्रीय म्हामार्ग आनी लॉजिस्टीक वेवस्थापन लिमिटेड (एनएचएलएमएल) ही कंपनी स्थापन केल्या. हे कंपनी वरवीं भौशीक- खाजगी तत्वाचेर (पीपीपी) लॉजिस्टीक पार्क उबारपाचें काम हातांत घेतलें, अशें मंत्री गडकरी हांणी लेखी जापेंत नमूद केलां.
गोंया सयत 35 राज्यांनी उबारपी लॉजिस्टीक पार्क प्रकल्पांक अर्थविशयक कॅबिनेट समितीन मान्यताय दिल्या. ते खातीर 50 हजार कोटी रुपयांची अर्थीक तजवीज केल्या. गोंयांतले लॉजिस्टीक पार्क राजधानी पणजे उबारतलें, अशेंय गडकरी हांणी जापेंत नमूद केलां.

लॉजिस्टीक पार्क विशीं म्हायती

लॉजिस्टीक पार्काचो उपेग कंपनींची उत्पादनां दवरपा खातीर करतात.
लॉजिस्टीक पार्कांत फ्रेट स्टेशन, सांठवणूक, वितरण, उत्पादनांचे ग्रेडींग, कार्गो अशो सुविधा मेळटात.
लॉजिस्टीक पार्कांत सांठयिल्लो म्हाल पेड्डेर जायना. संकश्टा वेळार ह्या म्हालाची लोकांक पुरवण करतात. ताका लागून वस्तूंच्या दरांचेर नियंत्रण उरता. लोकांक म्हारग दरान वस्तू घेवच्यो पडनात.
लॉजिस्टीक पार्कांत ट्रक टर्मिनल्स, कुलींग, वर्कशॉप, होलसेल मॉल तयार करतात. ताका लागून शारांत येवपी येरादारीचेर नियंत्रण दवरपाक तशेंच प्रदुशण उणे जावपाक मजत मेळटा.