भांगरभूंय | प्रतिनिधी
भलायकी मंत्री, अधिकाऱ्यां सयत मुख्यमंत्री घेतले नियाळ
भांगरभूंय । प्रतिनिधी
पणजी: गोंयांतलीं हॉस्पिटलां, भलायकी केंद्रां तशेंच भलायकी सुविधांचें मॅपिंग जातलें. गोंयांत आशिल्ल्यो सुविधा आनी गरजेच्यो सुविधा हांच्या प्रमाणाचो नियाळ मुख्यमंत्री डॉ. प्रमोद सावंत बसका घेवन घेतले. ही बसका फुडल्या सप्तकांत जातली, अशें भलायकी मंत्री विश्वजीत राणे हांणी सांगलां. पत्रकार परिशदेंत तांणी ही म्हायती दिली.
गोंयांत भलायकी सुविधांचो उणाव ना. देशांत सगळ्यांत बऱ्यो भलायकी सुविधा गोंयांत आसात. तरी लेगीत दिसान दीस दुयेंतींचो आंकडो वाडत आसा. दुयेसांचो आंकडो वाडत आसा. हाका लागून भलायकी सुविधां मदीं गरजे प्रमाण वाड करपाक जाय. भलायकी सुविधांची वाड करपा सयत तांचो दर्जो सुदारपाची गरज आसा.
बांबोळे गोंय वैजकी म्हाविद्यालय हॉस्पिटल आसा. म्हापश्यां आनी मडगांवां जिल्हो हॉस्पिटलां आसात. ते भायर वाळपय, सांखळे, दिवचले, तुयां, फोंड्यां, चिखले भलायकी केंद्रां (सीएचसी) आसात. आनीक कांय वाठारांनी मुळाव्या भलायकी केंद्रांची गरज आसा, कांय कडेन आरएमडीची (डिस्पेन्सरी) गरज आसा, हाचें मॅपींग जातलें. भलायकी केंद्रांतल्यो खाटीं, फार्मसी, दोतोरांचो आंकडो हांचोय नियाळ जातलो. कितल्यो सुविधा आसात आनी कितल्या सुविधांची गरज आसा, तें पळोवन सुविधा तयार जातल्यो. गरज आसा थंय दोतोर तशेंच खाटींची वेवस्था जातली. गरज आसा थंय भलायकी केंद्रां स्थापन जातलीं, अशें भलायकी मंत्र्यांनी सांगलें.
आनीक 25 अॅम्ब्युलन्सींची (108) गरज
गोंयाक आनीक 25 अॅम्ब्युलन्सींची (108 गाडी) गरज आसा. तांचो उणाव आशिल्ल्यान कांय वेळार अपघात थळार 108 गाडी पावपाक उशीर जाता. एकदम 25 अॅम्ब्युलन्सी हाडप शक्य नासलें तरी सध्या 10 तरी 108 अॅम्ब्युलन्सींची गरज आसा.
गोंय जालां अपघातांची राजधानी
गोंयांत अपघातांचें प्रमाण वाडत आसा. गोंय हें सध्या अपघातांची राजधानी जाल्या. जखमींचेर उपचार करपा खातीर आनीक 108 अॅम्ब्युलन्सी तशेंच भलायकी सुविधांची गरज आसा. दरेकल्यान जापसालदारीन गाडी चलोवपाची गरज आसा. आपूण गाडी चलय ना. आपल्याक गाडी चलोवपाक भिरांत दिसता, अशें भलायकी मंत्र्यांनी सांगलें.
गोमॅकाँत एन्डोस्कोपिक स्कल सर्जरी
तकली वा मेंदवाचेर ऑपरेशन (स्कल सर्जरी) आतां नाकांतल्यान (ईएनटी) करपाचें तंत्रज्ञान विकसीत जालां. ईएनटी आनी स्कल सर्जरी तज्ञ डॉ. निशीत शाह हांचे सयत बसका जाल्या. गोंय वैजकी म्हाविद्यालय हॉस्पिटलात एन्डोस्कोपिक स्कल सर्जरीचें केंद्र स्थापन जातलें. ट्युमर (मेंदवाचो कांक्र) हाचेर ऑपरेशन करप शक्य जातलें, अशें भलायकी मंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
