भांगरभूंय | प्रतिनिधी
केंद्रीय कामगार मंत्र्यांची राज्यसभेंत म्हायती
भांगरभूंय I प्रतिनिधी
पणजी : देशांतल्या बेरोजगारीचें सरासरी प्रमाण 2020-21 त 4.2 टक्के आसतना गोंयांत मात ते 10.5 टक्के आशिल्लें. ह्या काळांत गोंयांतल्या 15 ते 29 पिराय गटांतल्या बेरोजगारीचें प्रमाण 25.8 टक्के आशिल्ले, अशी म्हायती केंद्रीय कामगार राज्यमंत्री रामेश्वर तेली हांणी राज्यसभेंत दिल्ल्या लेखी जापेंत नमूद केल्या.
तृणमूल काँग्रेसचे खासदार लुईझीन फालेरो हांणी हो प्रस्न विचारिल्लो. फाटल्या वर्सा गाेंयांत बेरोजगारीचें प्रमाण कितलें आशिल्लें, असो प्रस्न विचारून ताची गटवार म्हायतीय खासदार फालेरो हांणी मागिल्ली. ताचेर जाप दितना केंद्रीय कामगार मंत्री तेली हांणी 2020-21 त गोंयांतले बेरोजगारीचें प्रमाण सरासरी 10.5 टक्के आशिल्ल्याचें लेखी जापेंत नमूद केलां.
गोंय सयत देशभरांतली बेरोजगारी उणी करपाक केंद्र सरकारान विवीध येवजण्यो चालीक लायल्यात. गोंयच्या मुळाव्या उदरगतीचेर भर दिवन चडांत चड रोजगार निर्मणे खातीर यत्न करतात, अशें मंत्री तेली हांणी लेखी जापेंत नमूद केलां.
मजगतीं, गोंयांतल्या वाडट्या बेरोजगारी वयल्यान विरोधी काँग्रेस, आप, गोवा फॉरवर्ड ह्या पक्षांनी सातत्यान भाजपाचेर टिका केल्या. केंद्रांत आनी गोंयांत भाजपाचेंच सरकार आसतनाय बेरोजगारीचेर नियंत्रण कित्याक येना, असो आरोप करून हालींच जाल्ल्या 10 दिसांच्या पावसाळी अधिवेशनांत विरोधकांनी सत्ताधाऱ्यांक धारेर धरिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
