भांगरभूंय | प्रतिनिधी
पणजी : नातलां आनी नव्या वर्साचे फाटभुंयेर गोंयांत पर्यटकांची गर्दी वाडपाक लागल्या. ताका लागून कोरोनाचे दुयेंतींय वाडपाक लागल्यात. बुधवारा 16 नवें दुयेंतीं मेळिल्ल्यान सक्रीय दुयेंतींचो आंकडो 52 जाला. सरकार स्थितीचेर नदर दवरून आसा. कोवीड मार्गदर्शक तत्वांची खर कार्यवाही जातली, अशें मुख्यमंत्री डॉ. प्रमोद सावंत हांणी सांगलें.
अंदूं वर्सा हाचे पयलीं केन्नाच दिसाक 16 दुयेंतीं मेळूंक नाशिल्ले. ते बुधवारा मेळ्ळे. तशेंच सक्रीय दुयेंतींचो आंकडो 52 जाल्ल्यान ल्हव ल्हव धोको वाडत आसा. हेर राज्यांनी कोरोनाचे दुयेंतीं वाडत आसात. गोंयांत लेगीत जेएन व्हॅरियंटाचे दुयेंतीं मेळ्ळ्यांत. नातलां आनी नव्या वर्साक लागून गोंयांत मोट्या प्रमाणांत पर्यटकांची गर्दी जावपाक लागल्या. केंद्रान राज्याक मार्गदर्शक तत्वां जारी केल्यात, पूण अजून मेरेन मास्क घालपाची सक्ती ना. कसलीच तपासणी ना, तशेंच कोणूच मास्क घाली ना. हाका लागून कोरोनाचे दुयेंतीं वाडपाची भिरांत आसा. राज्यांत 90 टक्के परस चड लोकांनी कोवीड लस घेतिल्ल्यान हुस्क्याचें कारण ना.
सध्या मास्क घालपाची सक्ती नासली ना, पूूण लोकांनी मास्क घातल्यार धोको उणो जातलो, अशें भलायकी खात्याचे डॉ. डॉ. प्रकाश सुर्यवंशी हांणी सांगलें. सगळ्या भलायकी केंद्रांनी आरटीपीसीआर चांचणी सुरू जाल्या. जोर येवपी आनी कोरोना दुबावितांची चांचणी करपाची शिफारस दोतोर करतात. बुधवारा 322 चांचणी उपरांत 16 दुयेंतीं मेळ्ळे. 15 दुयेंतीं घरा आयजोलेशनांत आसात जाल्यार एकल्याचेर हॉस्पिटलांत उपचार सुरू आसात. चांचण्यो तशेंच दुयेंतीं विशींचो अहवाल भलायकी खातें केंद्रांक सादर करता. जेएन व्हेरीएंटाचे दुयेंतीं आतां बरे जाल्यात. जाण्टे तशेंच जोर आयिल्ल्या लोकांनी गर्दींत वच्चे न्हय. मास्क घालून भायर सरचे, अशें आवाहन भलायकी खात्यान केलां.
नव्या वर्साक लागून गोंयांत पार्ट्यो सुरू जाल्यात. हॉटेलांनी गर्दी जावपाक लागल्या. हॉटेल तशेंच भौशीक सुवातांनी कोणूच मास्क घाली ना. शेजारच्या कर्नाटकान आतां निर्बंध लागू केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
