भांगरभूंय | प्रतिनिधी
-वर्सुकीं नुस्त्यांचें उत्पादन 0.04 दशलक्ष टन ते 0.06 दशलक्ष टन मजगतीं
पणजी: गोंयांत 2022 – 2023 वर्सा 0. 06 दशलक्ष टन (60 लाख कील) नुस्त्यांचें उत्पादन जालां. पोरूं वर्सा 2021 – 2022 वर्सा 0.05 लाख टन (50 लाख कील) नुस्त्याचें उत्पादन जाल्लें.
लोकसभेंतल्या प्रस्नोत्तरा वेळार सादर जाल्ल्या तपशीलांतल्यान ही म्हायती मेळ्ळ्या. राज्याचें वर्सुकीं नुस्त्यांचें उत्पादन फाटल्या बर्याच वर्सां सावन 0. 04 दशलक्ष टन (40 लाख कील) ते 0.06 दशलक्ष टन (60 लाख कील) मजगतीं आसा. 2020 – 2021 वर्सा नुस्त्यांचें उत्पादन 0.05 लाख टन (50 लाख कील) आशिल्लें. 8 वर्सां आदीं 2014 – 2015 वर्सा गोंयांत नुस्त्यांचें उत्पादन 0.03 दशलक्ष टन (30 लाख कील आशिल्लें.
नुस्त्यांचें उत्पादन वाडलां तरी ताचें प्रमाण क्रांतीकारक ना. गोंयां परस महाराष्ट्र, कर्नाटक आनी हेर जायत्या राज्यांनी नुस्त्यांचें उत्पादन चड आसा. पुराय देशांत 2022 – 2023 वर्सा 131.13 लाख टन नुस्त्यांचें उत्पादन जालां.
नुस्तेमारी हो गोंयकारांचो मुखेल वेवसाय. गोंयचें नुस्तें खावपाक भायल्यान लोक गोंयांत येतात. गोंयांक दर्यादेग लेगीत बरीच आसा. फाटल्या आठ वर्सांत नुस्त्यांचें उत्पादन मात वर्साक 60 लाख किला वयर वचूंक ना. दोन वर्सां पयलीं भाजी, द़द, नुस्तें हातूंत राज्य स्वयंपूर्ण जावचे म्हूण सरकारान स्वयंपूर्ण गोंय मोहीम सुरू केली. ही मोहीम सुरू जावचे पयलीं 2017 – 2018 वर्सा गोंयांत नुस्त्यांचें उत्पादन 60 लाख कील जाल्ले. 2022 – 2023 वर्सा लेगीत इतलेच नुस्त्यांचें उत्पादन जालां. नुस्तें पोसपा खातीर केंद्र सरकाराच्या मत्स्यसंपदा सारक्यो येवजण्यो आसात. हाचो लाव मर्यादीत जाला, अशें नुस्तें उत्पादनाचें प्रमाण पळयल्यार कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
