भांगरभूंय | प्रतिनिधी
भांगरभूंय I प्रतिनिधी
पणजी : प्रधानमंत्री नरेंद्र मोदी आनी राज्याचे मुख्यमंत्री डॉ. प्रमोद सावंत हांच्या आवाहनाक उपाट प्रतिसाद दिवन गोंयकारांनी शेनवारा घरांघरांनी तिरंगो हुबयलो. ताका लागून गोंय तिरंगो ध्वजांनी सजलां.
स्वातंत्र्याच्या अमृत महोत्सव वर्सा निमतान विवीध कार्यावळीं देशभर आयोजीत करपाचे प्रधानमंत्री नरेंद्र मोदी हांच्या फुडारपणा खाला केंद्र सरकारान निश्चीत केल्ले. ताचोच एक भाग म्हूण 13 ते 15 ऑगस्ट मजगतीं दरेक नागरिकान आपापल्या घरांचेर तिरंगो हुबोवपाचे आवाहन प्रधानंमत्री मोदी हांणी केल्ले. प्रधानमंत्र्यांच्या ह्या आवाहनाक उपाट प्रतिसाद दिवपाचो उलो मुख्यमंत्री डॉ. सावंत हांणी केल्लो. ताका लागून राज्यांतल्या भोवतेक नागरिकांनी घरांचेर तिरंगो हुबयला.
हे कार्यावळी निमतान प्रदेश भाजपान शेनवारा सकाळीं पोरणें गोंय सचिवालय ते आझाद मैदाना मेरेन तिरंगो रॅली काडिल्ली. हे रॅलींत मुख्यमंत्री डॉ. प्रमोद सावंत हांचे सयत पर्यटन मंत्री रोहन खंवटे, नुस्तें उद्देग मंत्री नीळकंठ हळर्णकार, महसूल मंत्री बाबूश मोंसेरात, भाजप प्रदेशाध्यक्ष सदानंद शेट तानावडे, म्हापौर रोहीत मोंसेरात, मुख्य सचीव पुनीतकुमार गोयल हांचे सयत हेर आमदार आनी नागरीक व्हड संख्येन वांटेकार जाल्ले.
मजगतीं, ताळगांव भाजपा मंडळान ताळगांव ते आझाद मैदाना मेरेन मोटार सायकल रॅलीय आयोजीत केल्ली. ताळगांव सयत हेर मतदारसंघांतल्या भाजप आमदारांनी मोटार सायकल रॅलींचे आयोजन केल्ले. सगल्याच रॅलींक नागरिकांचो उपाट प्रतिसाद मेळिल्ल्याचे दिसून आयले.
मजगतीं, फुडले दोन दीस सरकारान राज्यभरांत विवीध कार्यावळींचे आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
