भांगरभूंय | प्रतिनिधी
बालोद्यानाचो उणाव, बाल हक्क आयोगाचो निश्कर्श
भांगरभूंय I प्रतिनिधी
पणजी : भुरग्यां खातीर खेळपाचें, जाल्यार ज्येश्ठां खातीर विसव घेवपाचें हक्काचें थळ म्हणल्यार उद्यान. दिसान दीस लोक जिणे वयलो ताण जे परीन वाडटा ते प्रमाणांत उद्यानांची गरज वाडत आसा. गोंयांत उद्यानांचो आंकडो मात समाधानकारक ना. पुराय गोंयांत फक्त 158 उद्यानां आसात. काणकोण म्हालांत एकूय उद्यान ना. पेडणें आनी धारबांदोडें म्हालांत दरेकी एक उद्यान आसा.
गोंय राज्य बाल हक्क आयोगान केल्ल्या सर्वेक्षण अहवालांतली ही म्हायती. पंचायत तशेंच नगरपालिकांनी भुरग्यांची भलायकी, शिक्षण आनी उदरगती खातीर अर्थीक तजवीज करपाची गरज आसा. हातूंत बालोद्यान स्थापन करपा सयत ताची देखभाल करपाचो आस्पाव आसा. बालोद्यांनांत सीसीटीव्ही कॅमेरे बसोवपा सयत सुरक्षेची लेगीत तजवीज करपाची शिफारस बाल हक्क आयोगान केल्या.
बाल हक्क आयोगान उद्याना विशीं पुराय गोंयचें सर्वेक्षण केलां. सर्वेक्षणा उपरांत तांणी अहवाल जाहीर केला. गोंयांत 192 पंचायती आसात. एक म्हापालिका आनी 13 नगरपालिका आसात. तरी सगल्या उद्यानांचो आंकडो फक्त 158 आसा. बालोद्यानांत भुरग्यां खातीर खेळपाच्यो चड सुविधा उपलब्ध आसतात. हेर उद्यानांचो लेगीत भुरग्यांक वापर करपाची मेकळीक आसता. सरासरी विचार केलो जाल्यार पंचायतीं इतलो लेगीत उद्यानांचो आंकडो ना. ही हुस्क्याची गजाल आसा, असो आयोगाचो निश्कर्श आसा.
पेडणें म्हालांत 20 पंचायती आनी एक पालिका आसा. बालोद्यान मात एकूच आसा. दिवचल म्हालांत 5 उद्यानां आसात. हातूंत 3 बालोद्यानाचो आस्पाव आसा. सत्तरीत 12 पंचायती आसल्यो तरी फक्त होंडा पंचायतीत 3 उद्यानां आसात. वाळपय नगरपालिकेंत दोन उद्यानां आसात. बार्देश म्हालांत सगल्यांत चड म्हणल्यार 32 बालोद्याना आसात. 23 पंचायतींनी आसात जाल्यार 9 म्हापशें पालिका वाठारांत आसात. तिसवाडी म्हालांत 12 बालोद्यानां आसात. ताळगांवां 4, पोरणें गोंय 3, खोर्ली 3, गोलती नावेली 2 बालोद्यानां आसात. पणजे म्हापालिकेंत 7 उद्यानां आसात.
दक्षीण गोंयचो विचार केलो जाल्यार साश्ट म्हालांतल्या 30 पंचायतींनी 34 बालोद्यानां आसात. मडगांव पालिकेंत एक जाल्यार कुंकळ्ळी पालिकेंत 3 उद्यानां आसात. धारबांदोडें म्हालांत फक्त साकोड्ड्यां पंचायतीत एक उद्यान आसा.
फोंडें म्हालांत 19 पंचायतींनी 9 उद्यानां आनी फोंडें पालिकेंत 2 उद्यानां आसात. मुरगांवां पंचायतींनी 12 जाल्यार मुरगांव पालिकेंत 3 उद्यानां आसात. केपें म्हालांत 11 पंचायती आसात. फक्त शेल्डें पंचायत वाठारांत 2 जाल्यार केपें नगरपालिकेंत 2 उद्यानां आसात.
सांगें म्हालांत सांवड्डें पंचायतीत 3 उद्यानां आसात. हेर पंचायतींनी 3 जाल्यार सांगें पालिकेंत एक उद्यान आसा. कुडचडें – काकोडें पालिकेंत 4 उद्यानां आसात. कुडचडें – काकोडें नगरपालिका केपें म्हालांत येता.
नगरपालिका वाठारांतली बालोद्यानां
नगरपालिका वाठारांत 42 बालोद्यानां आसात. हातूंत भुरग्यांक खेळपाच्यो सुविधा आसात. पणजी म्हापालिकेंत 7, मडगांवां 2, म्हापशें 9, मुरगांवां 3, फोंडें 2, दिवचले 5, कुंकळ्ळी 3, कुडचडें काकोडें 4, केपें 2, पेडणें 1, वाळपय 2, सांखळे पालिकेंत 2 उद्यानां आसात.
उद्यानांचें जातलें ऑडीट
बाल हक्क आयोग सुरक्षेचे नदरेन बालोद्यानांचें ऑडीट करतलो. ऑडीट केले उपरांत सरकाराक शिफारशी सादर करतलो. हे खातीर आयोगान लोकां कडल्यान सुचोवण्यो मागयल्यात. बालोद्यांनांतल्या सुरक्षे खातीर यंत्रणा वा मार्गदर्शक तत्त्वां आसपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
