भांगरभूंय | प्रतिनिधी
पणजी ः राज्यांत एका वर्सात अर्थीक गुन्यांव दुपेटीन वाडल्यात. 2021 वर्सा राज्यांत 131 अर्थीक गुन्यांव नोंद जाल्ले. 2022 वर्सा ते 260 मेरेन वाडला. हांतूतले जायते 230 गुन्यांव अर्थीक फटवणूक संबंदीत आसात. हालींच नॅशनल क्रायम रेकॉर्ड ब्युरोन (एनसीआरबी) उजवाडायल्ल्या वर्सुकी अहवालांत हें उक्तें जालां.
अहवाला प्रमाण 2020 वर्सा वट्ट 153 अर्थीक गुन्यांव जाल्यात. अर्थीक गुन्यांवांत फटवणूक करप, बनावट चलन तयार करप आदि अशें वेगवेगळे गुन्यांव आसात. राज्यांतल्या वट्ट 260 अर्थीक गुन्यांवांतले चडशे 230 गुन्यांव फटवणूक, खोटी कागदपत्रां कडेन संबंदीत आसात. हांचे प्रमाण सगळ्यांत चड टक्केवारी 88.46 टक्के आसा. जाल्यार गुन्यांवकारी विश्वासघाताची 30 प्रकरणा नोंद जाल्यात.
2022 वर्सा अर्थीक गुन्यांवांचे प्रमाण 16.6 टक्के आनी आरोपपत्र दाखल करपाचें प्रमाण 47.4 टक्के आशिल्लें. डिसेंबर 2022 च्या निमाणे मेरेन पुलिसां कडल्यान 294 प्रकरणांची चवकशी प्रलंबीत आशिल्ली. तपास प्रलंबीत आशिल्ल्याचें प्रमाण 62.6 टक्के आशिल्लें. न्यायालयांत 2021 वर्सा वट्ट 1151, 2022 वर्सा 83 अशें वट्ट 1191 प्रकरणांची सुनावणी जाल्ली. तातूंतले 47 खटल्यांचो निकाल लायलो. न्यायालयांत खटले प्रलंबीत आशिल्ल्या प्रकरणांची टक्केवारी 96.2 टक्के आशिल्ली.
1 ते 10 लाख फटवणूकीची प्रकरणां चड
अर्थीक गुन्यांवांतल्यान चडशा पिडितांची 79 प्रकरणांत 1 ते 10 लाख रुपयांची फटवणूक जाल्या. हाचे भायर 64 जाणांक 1 लाखां परस उणी फटवणूक जाल्या, 36 जाणांक 10 ते 50 लाख रुपया मदीं फटवणूक जाल्या, 17 जाणांक 1 ते 10 कोटी रुपयांची फटवणूक जाल्या आनी 100 कोटी परस चड फटोवपाचो एक गुन्यांव नोंद जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
