भांगरभूंय | प्रतिनिधी
पणजी: अक्सिसीबल इंडिया खाला पयल्या टप्प्यांत 4 कोटी रुपया खर्च करून 22 सरकारी इमारती दिव्यांग स्नेही केल्यात. दुसऱ्या टप्प्यांत 9 कोटी खर्च करून आनीक 45 इमारती दिव्यांग स्नेही करतले. हे खातीर भौशीक बांदकाम खातें नोडल एजन्सी म्हूण काम पळयतलें अशी म्हायती मुख्यमंत्री डॉ. प्रमोद सावंत हांणी दिली.
सोमारा विजय सरदेसाय आनी कार्लोस फेरेरा हांणी लक्ष्य ओडपी सुचोवणेचेर ते उलयताले.
मुख्यमंत्र्यांनी म्हणलें, कांय पोरण्या सरकारी इमारतींनी बदल करप वा लिफ्ट बसोवप शक्य ना. अशा सुवातांनी आमी पयल्या टप्प्यांत रॅम्प, रेलींग, दिव्यांगा खातीर विशेश प्रसाधन घरां, विशेच सुचोवणी तक्टे लायल्यात. दुसऱ्या टप्प्यांत बांदकामांत बदल करून इमारती दिव्यांग स्नेही करतले. ह्या टप्प्यांत लिफ्ट बसोवप, सुलभ प्रवेशा खातीर वेवस्था, कॉरिडॉर आनी दारां मोटी करप अशे विवीध उपाय करतले.
तांणी म्हणलें, हाचे बगर भौशीक बांदकाम खात्या वतीन सरकारी इमारतींनी दिव्यांग स्नेही पदपथ आनी पार्कींग उबारप, व्हीलचेर वचपा खातीर बांदकामांत बदल करप, दोळ्यांनी दिसना आनी कानान आयकूंक येना हांचे खातीर विशेश मजत उपलब्ध करप, सरकारी कचेऱ्यांनी आसन वेवस्था, सेवा कावंटर आनी हेर सरकारी सोयी दिव्यांग स्नेही करतले. सरकार दिव्यांगा खातीर गंभीरपणान काम करीत आसा. तांच्या चेऱ्याचेर 365 दीस हांसो हाडपा खातीर आमचो यत्न आसतलो.
ताचे पयलीं जाल्ले चर्चेंत सभाघरांत हाजीर आशिल्ल्या सगल्या आमदारांनी सरकारी, खाजगी इमारती आनी भौशीक येरादारी वेवस्था दिव्यांग स्नेही आसप गरजेची आशिल्ल्याचें मत मांडलें. आमदार विजय सरदेसाय हांणी नव्या इमारतींक परवानगी दितना त्यो दिव्योग स्नेही आसप बंधनकारक करपाची मागणी केली. नव्या इमारतींक दिव्यांगजन आयुक्तां कडल्यान परवानगी घेवची. फक्त रॅम्प आनी रेलींग नाका जाल्यार परिपूर्ण दिव्यांग स्नेही इमारत करची अशी मागणी तांणी केली. मायकल लोबो, दिगंबर कामत, विरेश बोरकार, डॉ. चंद्रकांत शेट्ये हांणीय अशीच मागणी केली.
विरोधी पक्ष फुडारी युरी आलेमांव हांणी दिव्यांगाच्या प्रस्नाचेर सरकार गंभीर नाशिल्ल्याचो आरोप केलो. तांणी म्हणलें, सभाघरांत हे विशीं खूबशे फावटी चर्चा जाली, तरी सरकारान कसलीच ठाम उपाय येवजण केली ना. फाटल्या विधानसभा अधिवेशनांत एका दिव्यांग विद्यार्थ्याक उबारून सभाघरांत हाडचे पडिल्ले. ही आमचे खातीर लजेची गजाल आसा. सरकारान कांय दर्यादेगांचेर दिव्यांगा खातीर सोय केल्या. पूण ताची सद्याची स्थिती कितें आसा ती सांगची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
