भांगरभूंय | प्रतिनिधी
भांगरभूंय । प्रतिनिधी
पणजीः गोंयांत सुमार 1200 आंगवाडींत आंगणवाडी कर्मचारी आनी आंगणवाडी सेविका अशी 91 पदां रिती आसात. जाल्यार गोंयांतली एक आंगणवाडी सध्या बंद आसा. तशेंच आंगणवाडींतल्या भुरग्यांचे पोशण आनी हेर गजाली खातीर केंद्रातल्यान गोंयांक फाटल्या पांच वर्सांत 75 कोटी आयल्यात, अशी म्हायती केंद्रीय बायल आनी भुरगी उदरगत मंत्रालयान दिल्या.
राज्यसभेच्या पटलार देशभरांतल्या आंगणवाडी केंद्रांत रिती आशिल्ली पदां आनी साधन-सुविधा त्रुटी विशींची लेखी म्हायती केंद्रीय बायल आनी भुरगी उदरगत राज्य मंत्री सावित्री ठाकूर हांणी दिल्या.
गोंय राज्यांत मंत्रालयान 1262 आंगणवाडी केंद्रांक मान्यताय दिल्या आनी तातूंतली फकत 1261 आंगणवाडी कार्यरत आसात. फकत एक आंगणवाडी चालू ना. ह्या आंगवाडींनी, आंगणवाडी कर्मचारी आनी आंगणवाडी सेविका मेळून 91 पदां रिती आसात. आंगणवाडी कर्मचाऱ्यांची 37 पदां आनी आंगणवाडी सेविकांची 54 पदां रिती आसात.
जाल्यार ह्या आंगणवाडी खातीर मिशन सक्षम आंगणवाडी आनी पोशण 2.0 सकयल केंद्रातल्यांन 75.96 कोटी निधी मंजूर जाल्लो तातूंतलो 64.23 कोटी रुपयांचो वापर राज्य सरकारान केलां. वर्स 2019-20त केंद्रातल्यांन 16.02 कोटी आयल्ले तातूंतलो 17.02 कोटी निधी राज्यांन खर्च केलो, 2020-21त 20.44 कोटी नीधी केंद्रातल्यांन आयिल्लो तातूंतलो 17.46 कोटी नीधी सरकारान खर्च केलो, 2021-22त 10.84 कोटी नीधी केंद्रातल्यांन आयिल्लो आनी 12.92 कोटी सरकारान खर्च केलो, 2022-23त 14.71 कोटी निधी क्रेंद्रातल्यांन आयिल्लो आनी राज्यांन 16.83 कोटी खर्च केलो. जाल्यार 2023-24त 13.95 कोटी इतलो निधी केंद्रातल्यांन आयला पूण ह्या निधीच्या खर्चाचो तपशील दिवंक ना.
मिशन सक्षम आंगणवाडी आनी पोशण 2.0 खाला पांच वर्सांचे काळा खातीर 50 हजार आंगणवाडी केंद्रा बांदपाची तरतुद आसा. दर वर्सा 10 हजार आंगणवाडी बांदपा खातीर दरेक आंगणवाडीक केंद्राक 12 लाख मेरेन निधी मेळटा. हांतूत मनरेगा कडल्यान 8 लाख, 15वे वित्त आयोगा कडल्यान 2 लाख आनी बायल आनी भुरगी उदरगत मंत्रालया कडल्यान 2 लाख सयत राज्यांचो स्वतःचो वांटो हांतूत घालचो पडटा. तशेंच गरजेच्या सुविधा बगर भाड्याच्या सुवातेत चलपी आंगणवाडी लागसारच्या प्राथमिक शाळेत सुवात मेळत जाल्यार स्थलांतरीत करची अशें निर्देश केंद्रान राज्यांक दिला.
सामान्य आंगणवाडीचे तुळेंत सक्षम आंगणवाडींक उत्कृश्ट दर्जाच्यो सुविधा जश्यो की एलईडी स्क्रिन, उदकाचो फिल्टर, पोशण वाटीका, पुस्तका सारकिल्ल्या गजालींचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
