भांगरभूंय | प्रतिनिधी
जनगणने उपरांत कायदे बदलूं येतातपणजीः येवपी विधानसभा वेंचणुकेच्या वेळा मेरेन राज्यांतल्या मतदारसंघांचो आंकडो 40 वयल्यान 50 जावपाची शक्यताय आसा. बुधवारा आमच्या प्रतिनिधी कडेन उलयतना सरकारी सूत्रांनी मतदारसंघ पुनर्गठन केंद्रान नेमिल्लो आयोग जनगणने उपरांत मतदारसंघांचो विस्तार करपा विशीं निर्णय घेतलो अशी म्हायती दिली.
सध्या राज्यांत 40 विधानसभा मतदारसंघ आसात. एसटी आनी बायलांच्या आरक्षणाचे फाटभुंयेर येवपी विधानसभा वेंचणुके आदीं मतदारसंघांचें पुनर्गठन जावपाची शक्यताय आसा. पूण मतदारसंघांचें पुनर्गठन करचे पयलीं केंद्र सरकार जनगणने खातीर स्वतंत्र आयोग स्थापन करतले. जनगणने उपरांतच आयोग भारताचें संविधान आनी संघराज्य विधेयक विचारांत घेवन राज्यांतल्या मतदारसंघांचो आंकडो वाडोवपा विशीं निर्णय घेतलो. सध्या राज्य सरकार मतदारसंघांची संख्या वाडोवपाच्या फाटबळांत आसा आनी मतदारसंघांची संख्या 40 वयल्यान 50 करपाक तयार आसा अशें सूत्रांनी सांगलें.
मतदारसंघांची पुनर्रचना करतना मतदारसंघांची लोकसंख्या, तांची शिम आदी सगळ्या गजालींचो पुनर्रचणूक आयोगाक अभ्यास करचो पडटलो. हे विशीं गोंया खातीर वेगळो कायदो आशिल्ल्यान आयोग मतदारसंघांचो आंकडो वाडोवपाचो विचार करपाक शकता असोय उल्लेख सूत्रांनी केला.
…………………………..
आदले केंद्रीय कायदो मंत्री अॅड. रमाकांत खालप हांणी सांगलें…
– गोंयांत पयलीं 30 विधानसभा मतदारसंघ आशिल्ले. 1987 वर्सा घटक राज्याचो दर्जो मेळ्ळे उपरांत गोंयांत विधानसभा मतदारसंघांची संख्या 60 मेरेन वाडोवपाची तरतूद आशिल्ली. पूण त्या वेळार 40 मतदारसंघ तयार जाले.
– आतां लेगीत राज्यांतल्या विधानसभा मतदारसंघांची संख्या 60 मेरेन वाडोवंक मेळटा. पूण ते खातीर भारतीय संविधानांतलो संबंदीत कलम आनी घटक राज्यां विशींच्या विधेयकांत दुरुस्ती करची पडटली. ह्या दुरुस्ती उपरांत मतदारसंघांचो आंकडो वाडोवंक मेळटा.
………………………………….
जिल्हो परिशद विसर्जीत जावपाची शक्यताय
राज्यांतल्या मतदारसंघांची संख्या 50 मेरेन वाडयल्यार जिल्हो परिशद विसर्जीत करूं येता. दोन जिल्ह्यांत दरेकी 25 मतदारसंघ तयार केल्यार जिल्हो परिशदांची गरज ना अशें सरकाराचें धोरण आसा, अशेंय सूत्रांनी स्पश्ट केलां.
………………………………….
राजकी मळार जावंक शकतात व्हड बदल
– मतदारसंघांचो आंकडो 50 जालो जाल्यार ताचो परिणाम फुडल्या राजकारणाचेर दिसपाची शक्यताय आसा.
– राज्यांतल्या कांय बळिश्ट फुडाऱ्यांचें आपापल्या मतदारसंघाचेर पुराय वर्चस्व आसा. त्याच मतदारसंघांत दुसरो मतदारसंघ तयार जालो जाल्यार संबंदीत फुडाऱ्यांनी दोनूय मतदारसंघ आपल्या नियंत्रणा खाला दवरून राजकी वर्चस्व मेळोवपाचो यत्न करूं येता.
– राज्यांत फाटलीं बारा वर्सां भाजपा सरकार आनी केंद्रांत धा वर्सां सत्तेर आसा. देखून मतदारसंघांच्या पुनर्गठना वरवीं मतदारसंघांची संख्या वाडोवपाचो निर्णय घेतलो जाल्यार ही प्रक्रिया पुराय जातकच राज्यांत मतदारसंघांची संख्या वाडोवपा खातीर भाजप नेमके कितें विचार करतलो तें स्पश्ट जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
