भांगरभूंय | प्रतिनिधी
सांगोल्डा फूड बँकेचीं आझाद मैदानार निदर्शनां
दीसपट्टे सुमार 5 हजार कील अन्न वता फुकट
पणजी: अन्न हो दरेक मनशाचो मुळावो अधिकार. खंयचोच मनीस उपाशी पोटार न्हिदचो न्हय. गोंयांत दीसपट्टे सुमार पांच हजार कील अन्न फुकट वता. हें अन्न गरजू लोकां मेरेन पावोवप गरजेचें आसा, अश्यो घोशणा दीत सांगोल्डा फूड बँके वतीन आझाद मैदानार शुक्रारा निदर्शनां केलीं.
सांगोल्डा फूड बँक अन्न सुरक्षा आनी मानक प्राधिकरणाच्या वॅबसायटीर नोंदणीकृत संस्था आसा. आमी सेगीत प्राधिकरणाच्या मुखेल्यांक सांगीत आसात की तांणी गोंयांतल्या कारखान्यांतलीं कॅण्टिनां तशेंच खावपाची सुवात हांगा सावन दीसपट्टे कोयरांत उडोवपी अन्न फूड बँकेक दिवपा विशीं पत्रा वरवीं कळोवचें. तशेंच हें अन्न आमचे मेरेन पावोवपा खातीरची वेवस्था करची. पूण तांणी ही गजाल गंभीरतायेन घेतली ना. अशें संस्थेचे डोनल्ड फर्नांडीस हांणी सांगलें.
आमचो लढो हो गरिबां खातीर आसा. कोणूच रातचो उपाशी पोटार न्हिदचो न्हय हे खातीर आमची धडपड आसा. गोंयांत सुमार 200 कंपनींतल्यान दीसपट्टे फुकट वचपी अन्न ह्या लोकां मेरेन पावोवं येता. हाका लागून कोयरा प्रकल्पां वयलो कोयरूय उणो जावंक शकता. जाल्यार अन्न एकठांय करपाच्या निमतान कांय तरणाट्यांक कामूय मेळूंक शकता. म्हणून ह्या विशया कडेन गंभीरतायेन पळोवप गरजेचें आसा अशें फर्नांडीस हांणी म्हणलें.
प्रधानमंत्री नरेंद्र मोदी हांच्या आवाहनाक प्रतिसाद दीत आमी फूड बँक सुरू केली. अन्न आनी वखदां प्रशासनाच्यो मुखेली ज्यो अन्न सुरक्षा प्राधिकरणाच्योय मुखेली आसात. त्यो आमचे कडेन आयिल्ल्यो. पूण एकदां येवन गेले उपरांत सेगीत मागणी करून लेगीत तांणी कसलीच ठोस अशी कारवाय केली ना. म्हणून आमी फुडल्या सप्तकांत राज्यपालांक हे विशीं निवेदन दिवपाचे आसात. तशेंच फुडल्या म्हयन्यांत हाचे आड जनहीत याचिका दाखल करपाचे आसात अशी शिटकावणी फर्नांडीस हांणी दिली.
निदर्शनांच्या वेळार कांय गरजू नागरीक रितीं ताटां घेवन बशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
