भांगरभूंय | प्रतिनिधी
भांगरभूंय । प्रतिनिधी
पणजी: येरादारींत वाड जाल्ल्यान पणजे सयत सगळ्या शारांनी येरादारीची कोंयडी जायत आसा. सदोश सिग्नल यंत्रणेक लागून वाहनचालकांक त्रास जाताच, ते भायर येरादारीचे कोंयडेंत वाड जाता. अपघातांचें प्रमाण वाडत आसलें तरीय सिग्नल यंत्रणेचे देखभाली कडेन मात सरकारी यंत्रणांची आडनदर जाता, अशें सामान्य लोकांचें मत आसा.
गोंयांत दिसान दीस गाडयांचो आंकडो वाडत आसा. गाडयांच्या प्रमाणांचे तुळेंत रस्त्यांची रुंदाय आनी दर्जो मात वाडूंक ना. पणजे स्मार्ट सीटीच्या कामांक लागून सकाळीं आनी सांजे दर दिसा येरादारीची कोंयडी जाता. पणजे दुचाकी वा चारचाकी चलोवप म्हणल्यार एक दिव्य थारता. हेर शारांनी हेर कारणांक लागून येरादारीची कोंयडी जाता. म्हापशें, दिवचल, सांखळी, फोंडें, मडगांव, वास्को ह्या सगळ्या शारांनी सकाळीं आनी सांजे येरादारीची कोंयडी थारिल्ली आसा. नवे वर्स लागीं पाविल्ल्यान पर्यटक येवपाक सुरवात जाल्या.
फाटल्या म्हयन्यांचे तुळेंत रस्त्यांचेर गाडयांचो आंकडो दुपेटीन वाडला. येरादारीची कोंयडी जावची न्हय हे खातीर पोरूं खूब कडेन कडेन सिग्नलां बसयल्लीं. पणजी- सांत इनेज वाठारांत बसयिल्लें सिग्नल कितलेशेच म्हयने बंद आसा. सांत इनेज जंक्शनाचेर खूब अपघात जाल्यात. स्मार्ट सीटीच्या कामां खातीर सांत इनेज जंक्शन ते चर्ची मेरेन खणप सुरू आसा. हातूंत सिग्नल बंद आशिल्ल्यान दुश्काळांत तेरावो म्हयनो अशी वाहनचालकांची गत जाल्या.
आत्माराम बोरकर रोड, सांत इनेज ते काकुलो सर्कल मेरेन गाडी चलोवप घातक जालां. रस्त्याचेर धुल्ल आनी उदक आसता. हाका लागून दुचाकी निसरून पडून अपघात जावपाची शक्यताय आसता.
पोरणे गोंय ते कदंबा बस स्टॅण्ड म्हामार्गार आशिल्लें सिग्नल (मेरशी जंक्शन) केन्ना चलता, केन्ना चलना. चारूय वटांतल्यान गाडयो येतात. सिग्नलाक पळावचे काय पुलिसांच्या हाताकडेन पळोवचे, असो गोंदळ वाहनचालकांचो जाता.
सांखळी हॉस्पिटला कडेन दोन वर्सां आदीं स्मार्ट सिग्नल बसयिल्लें. मुख्यमंत्री डॉ. प्रमोद सावंत हांच्या फुडाकारान तें सिग्नल बसयिल्लें. तें सिग्नल फाटले तीन म्हयने बंद आसा. ह्या जंक्शनाचेर लेगीत खूबशे अपघात जाल्यात.
देखभाली विशीं आरोप- प्रत्यारोप
येरादारी वेवस्थापन हो विशय खूबश्या खात्यां कडेन संबंदीत आसा. येरादारी खातें, येरादारी पुलीस, नगरपालिका आनी भौशीक बांदकाम खातें हांचो ताळमेळ आसपाक जाय. सिग्नलांचे बाबतीत मात खात्यांचो ताळमेळ ना, हें स्पश्ट जालां.
येरादारी सिग्नलांची देखभाल करपाची जापसालदारकी येरादारी पुलिसांची ना. संबंदीत नगरपालिका आनी भौशीक बांदकाम खात्यान सिग्नलाची देखभाल करपाक जाय. कांय सिग्नलां सीएसआर येवजणे खाला उबारल्यांत. थेट येरादारी पुलिसांक सिग्नल देखभालीचो विशय लागना, अशें येरादारी पुलीस अधिक्षक अक्षत कौशल हांणी सांगलें.
सांखळी हॉस्पिटला कडलें सिग्नल खूब म्हयने बंद आसा. ह्या सिग्नलाची देखभाल कलरकॉन कंपनी करताली. कलरकॉन कंपनीचें देखभालीचें कंत्राट सोंपलां. नव्या कंत्राटदाराची नेमणूक नगरपालिकेन केल्या. बंद आशिल्लें सिग्नल परत सुरू जातलें, अशें सांखळेची नगराध्यक्ष रश्मी देसाय हांणी सांगलें.
स्मार्ट सीटीच्या कामांक लागून वाहनचालकांक त्रास जाता, अशें पणजीचे म्हापौर रोहित मोन्सेरात हांणी सांगलें. सिग्नलां कित्याक चलनात, तें आपणाक खबर ना. स्मार्ट सीटीचें काम पुराय जालें उपरांत येरादारी सुरळीत जातली. कंत्राटदाराक उपाययेवजण्यो करपाचे आदेश दिल्याचे तांणी सांगलें.
येरादारी सिग्नलांची देखभाल करपाची जापसालदारी नगरपालिका आनी भौशीक बांदकाम खात्याची आसा. येरादारी पुलिसांनी संबंदीत खात्यांक कळयलां.
अक्षत कौशल, येरादारी पुलीस अधिक्षक
देखभाल करपी कंत्राटदाराचें कंत्राट सोंपलां. हाका लागून सांखळे हॉस्पिटला कडलें सिग्नल बंद आसा. नव्या कंत्राटदारची नेमणूक जाल्या. सिग्नल सुरू जातलें.
रश्मी देसाय, नगराध्यक्ष, साखळी
स्मार्ट सीटीच्या कामांक लागून येरादारीची कोंयडी जाता. सांत इनेज सिग्नल कित्याक बंद आसा तें खबर ना. चवकशी करून सिग्नल सुरू करपाची वेवस्था करतां.
रोहित मोन्सेरात, म्हापौर, पणजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
