भांगरभूंय | प्रतिनिधी
‘कोर्डेलिया’ पर्यटक बोट लागली मुरगांव धक्यार
टुरिस्ट टॅक्सी कावंटराचें उक्तावण
वास्को: मुंबय सावन प्रवाशांक घेवन आयिल्ली ‘कोर्डेलिया’ पर्यटक बोट मुरगांव बंदरांतल्या धक्यार शुक्रारा लागिल्ल्यान गोंयच्या सागरी पर्यटन मोसमाक सुरवात जाल्या. नोव्हेंबरा सावन आंतरराष्ट्रीय पर्यटक बोटींचें आतां येवप-वचप सुरू जातलें अशें मुरगांव बंदर प्राधिकरणाचे अध्यक्ष व्यंकट रमण आक्काराजू हांणी सांगलें. सागरी पर्यटनाक लागून थळाव्या वेवसायाक उर्जा मेळपाक मजत जातली अशें तांणी स्पश्ट केलें. फुडारांत चडांत चड देशी आनी आंतरराष्ट्रीय प्रवाशी बोटी गोंयांत येतल्यो अशें तांणी सांगलें.
मुरगांव धक्यार लागिल्ल्या कोर्डेलिया प्रवाशी बोटींतल्यान सुमार 782 प्रवाशी गोंयांत आयले. हे बोटीचेर सुमार 300 कर्मचारी आनी हेर कामगार आसात. मुरगांव धक्यार बोट लागले उपरांत अर्द्या परस चड प्रवाशी गोंय दर्शना खातीर भायर सरले. ताका लागून टुरिस्ट टॅक्सीकार कांय प्रमाणांत सुखावले.
फाटलीं दोन वर्सां कोविडाक लागून पर्यटक बोटी धक्यार लागूंक नाशिल्ल्यो. ताका लागून ताचो व्हड परिणाम थळाव्या वेवसायाचेर चड करून टुरिस्ट टॅक्सीकारांचेर जाल्लो.
मजगतीं, पर्यटकांचे सेवे खातीर मुरगांव बंदर वाठारांत सुरू केल्ल्या टुरिस्ट टॅक्सी युनियनाच्या कावंटराचें उक्तावण मुरगांवचे आमदार संकल्प आमोणकार हांचे हाजिरेंत एका पर्यटक जोडप्याचे हस्तुकीं जालें.
ह्या कावंटराक लागून थळाव्या टुरिस्ट टॅक्सीकारांक लाव जातलो अशें तांणी सांगलें. ह्या कावंटराचो लाव मुरगांव म्हालांतल्या मुरगांव, वास्को, दाबोळी, कुठ्ठाळी ह्या मतदारसंघांतल्या सगल्या टुरिस्ट टॅक्सीकारांक घेवंक मेळटलो. कसलोच भेदभाव करचें नात अशें तांणी स्पश्ट केलें.
गोंयांत येवपी पर्यटकांक बरी सेवा मेळची तशेंच थळाव्या टुरिस्ट टॅक्सीकारांक वेवसाय मेळचो हे खातीर टुरिस्ट टॅक्सी सेवा कावंटर उक्तो केला. हाचे पयलीं टुरिस्ट टॅक्सी युनियनाच्या कावंटराचेर दरेके भोंवडे फाटल्यान कांय रक्कम घेताले. ताका लागून टॅक्सीकार ती रक्कम पर्यटकां कडल्यान वसूल करताले. नव्यान उक्तें केल्ल्या कावंटरांत अशे तरेची रक्कम घेवची न्हय अशें आपणें संबंदितांक सांगलां अशें आमोणकारान सांगलें.
हो कावंटर उक्तो करपा खातीर मुख्यमंत्री डॉ. प्रमोद सावंत, पर्यटन मंत्री रोहन खंवटे, मंत्री मॉवीन गुदिन्हो हांचे व्हड सहकार्य मेळ्ळां अशेंय आमोणकारान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
