गोंयच्यान तेलंगणाक सोरो व्हरपी कदंब ड्रायव्हर, कंडक्टराक अटक
भांगरभूंय | प्रतिनिधी
एक लाखांच्यो वेगवेगळ्या ब्रँडाच्यो 70 सोऱ्याच्यो बाटल्यो जप्त
हैदराबाद ः गोंयच्यान तेलंगणाक सोरो व्हरपी कदंबा बसीचो ड्रायव्हर आनी कंडक्टर हे दोगांकय मेडकच्या (तेलंगणा) अबकारी खात्याच्या पंगडान आयतारा अटक केली. उल्हास श्रीधर (५२) आनी आबासाहेब व्ही. राणे (५१) अशीं तांची नावां. तांच्या कडल्यान एक लाख रुपयांच्यो सोऱ्याच्यो बाटल्यो जप्त केल्यात.
गोंय सावन हैदराबाद वचपी जीए- 03 एक्स- 0478 क्रमांकाच्या कदंबा येरादारी म्हामंडळाच्या बसीतल्यान सोरो व्हरता अशी खात्रीची म्हायती पंगडाक मेळ्ळी. ते प्रमाण ह्या पंगडान तेलंगणाच्या मेडक जिल्ह्यांतल्या कामकोले टोल प्लाझा लागसार बस थारायली आनी तपासणी केली. ह्या वेळार बसीत वेगवेगळ्या ब्रँडाच्यो 70 सोऱ्याच्यो बाटल्यो मेळ्ळ्यो. बाजारांत तांचें मोल 1 लाख रुपया आशिल्लें. पंगडान सगळ्यो बाटल्यो जप्त करून ड्रायव्हर आनी कंडक्टराक अटक केली.
सोरो बंदी आनी अबकारी अंमलबजावणी खात्याचे सहाय्यक आयुक्त के. रघुराम हाणी वयली म्हायती दिली. दोगांय दुबावितांनी सोऱ्याची तस्करी केल्ल्याची कबूल केला. तेलंगणा परस गोंयांत सोऱ्याचे दर खूब उणे आसात. देखून तेलंगणा सावन येवपी प्रवासी व्हड प्रमाणांत सोरो विकतो घेतात. हे दुबावीत बुकींगांतल्यान तांका प्रोत्साहन दितात अशें रघुराम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
