भांगरभूंय | प्रतिनिधी
कारवार, खबरां संस्था : गोंयच्यान कारवाराक १ लाख १८ हजार रुपयांचो टॅम्पोंतल्यान व्हरपी गोंय निर्मित सोरो कारवार शार पुलिसांनी जप्त केला. ह्या प्रकरणांत दोगांक पुलिसांनी अटक केल्या. जाल्यार एकटो पळ्ळो. संतोष ठाकरकर (रावपी कारवार ) आनी प्रसाद देसाय (रा. गुळापूर, यल्लापूर) अशी अटक केल्ल्यांचीं नांवां जावन आसात. जाल्यार अवरसा अंकोला हांगाचो मिथून नायक फरार आसा. ताचो सोद पुलीस घेतात.
गोंयच्यान कारवाराक गोंयच्या सोर्याची तस्करी जाल्ल्याची म्हायती शार पुलिसांक मेळ्ळी. ते प्रमाण काळी न्हंयेच्या पुला लागसार आशिल्ल्या खापरी देवस्थाना मुखार आडोवन टाटा एसी ह्या वाहनाची तपासणी केली. तेन्ना गोंयचे फेणीच्यो ५०४ बाटल्यो, व्हिस्कीच्यो २८८ बाटल्यो आनी हेर सोरो सांपडलो. ताची कर्नाटकांत १ लाख १८ हजार ६०० रुपया अशी किंमत आसा. तशेंच ह्या प्रकरणांत २ लाख रुपया किंमतीचें टाटा एसी हें वाहन जप्त केलां. कारवार शार पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
