भांगरभूंय | प्रतिनिधी
आमचें गोंय माणकुलें. देशाच्या नकाशा वयलें एक सोबीत सुंदर फुल कशें. हालींसरा ताका कोणाची तरी दिश्ट लागल्या. सगळ्यांचीच ताजेर नजर. वायट नजर म्हणल्यार अतिताय जावची ना. तांकां गोंयात व्हडल्यो- व्हडल्यो जमनी जाय. जे कोण पर्यावरण सांबाळपा खातीर तांकां विरोध करतले तांकां एक तर ते विकते घेतले नाजाल्यार तांचेर तरातरांची चेंपणां हाडटले, कोर्टान केशींनी घुसपायतले. एक, दोन न्हय तरातरांनी त्रास दितले. तांकां पालव दिवपाक कितले तरी जाण तयार आसतात. तांकां फावा ती घसघशीत वाडी पावतली. तें कशे करून घेवचे तें तांकां बेस बरें खबर आसा.
थंय ते बिल्डिंगो बांदतले. ते बांदतले आनी गोंयकारांक विकतले. कोटीच्या कोटी रुपया जोडटले. मागीर तुमच्या आमच्या भुरग्या बाळांक विकतले. आमच्यो जमनी तांकां विकल्या उप्रांत आमच्या भुरग्यांक जमनी खंयच्यो उरतल्यो? तांका घर बांदचें दिसलें जाल्यार तांकां जमीन विकती घेवपा खातीर जमीन उरतली? ते जमनीचो प्रेस आमच्या भुरग्यांक परवडतलो? मागीर ताणी खंय घर बांदपाचें? आपल्याच गांव घरा परकी जावपाचें? हो खंयचो न्याय? असलो अन्याय आमी मुकाट्यांनी सोंसून घेवप कितले बरोबर? आमी मनशां. जनावरां तर न्हय. जनावरां पसून शिंगा दाखयतात. तांचे कडसून आमी कायंच शिकचे नात? भितरल्ले भितर घुस्पटले? ही घुसपट आमची वाट लावची ना?
हें सगलें टाळतले जाल्यार आमी आमचे भोंवतणी काल कितें घडलें, आयज कितें घडटा, फाल्यां कितें घडूं शकता हाचेर विचार करपाक जाय. त्या खातीर बारीकसाणीन अभ्यास करपाक जाय. त्या प्रमाण फुडलो मार्ग थारावपाक जाय. हात कवळून वगी बसले म्हणून कांयच जावपाचें ना.
एका तेंपार गोंयकार शेतांभाटां रोयतालो,कुळागरांत काम करतालो, सुखा समाधानान जियेतालो. झगडीं झुजां नासलीं. शेजाऱ्यांक पावतालो. सोयरे येताले. तो सोयऱ्यागेर वेतालो. सगळें बरे भशेन चलतालें. सगळे दीस सारके नासतात. तशेंच जालें. आमच्या भांगारा सारक्या जमनीचेर तांची नजर गेली. तांचे कडेन साकांनी काळो, धवो पयसो. बऱ्या आनी आड मार्गान जोडलेलो. मनीस विकते कशे घेवचे हें तांकां बेसबरें खबर. आमचे कितले तरी मनीस तांचे भकीक पडले. पयशा फुडें तांकां कायंच दिसना जालें. ते कुड्डे जाले. मनीसपण विसरले. आपलेच आवयक तांणी पावणेक काडली. हें तुमी ओग्गी रावून पळेतले? काय हाच्या आड आवाज काडटले? मात्सो विचार करात. फुडें सरात. आमचें गोंय फुडल्या पिळग्यां खातीर सांबाळून दवरूया.
सियाटेल- अमेरिका
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
