गोंयचो द्रविड ब्राह्मण संघ विद्यार्थ्यांचो करतलो भोवमान ः अर्ज मागयतात

भांगरभूंय | प्रतिनिधी

भांगरभूंय प्रतिनिधी
पणजी ः गोंयच्या द्रविड ब्राह्मण संघाचे वतीन विशेश गूण मेळयिल्ल्या विद्यार्थ्यांचो दरवर्सा भोवमान जाता. अंदूंय हो भोवमान जातलो. ते खातीर ह्या संघान ज्ञातीबांधवाच्या पात्र विद्यार्थ्यां कडल्यान अर्ज मागयल्यात
यत्ता धावेचे परिक्षेंत सगल्या विशयांत उणेच 90 टक्के गूण मेळयिल्ल्या ज्ञातीबांधव विद्यार्थ्यांचो भोवमान करतले. तशेंच यत्ता धावेचे परिक्षेंत संस्कृत विशयांत उणेच 95 टक्के गूण मेळयिल्ल्या ज्ञातीबांधव विद्यार्थ्यांचोय भोवमान जातलो. मराठी विशयांत अर्ज करतल्यां मदल्या सगल्यांत चड गूण मेळयिल्ल्या पयल्या तीन ज्ञातीबांधव विद्यार्थ्यांचो भोवमान करतले. संस्कृत विशया खातीरचो पुरस्कार सगल्या हेर ज्ञातींतल्या बांधवां खातीर उक्तो आसा.
यत्ता बारावेचे परिक्षेंत कला आनी वाणिज्य फांट्यांत उणेच 85 टक्के गूण मेळयतल्या आनी विज्ञान फांट्यांत उणेच 90 टक्के गूण मेळयतल्या ज्ञातीबांधव विद्यार्थ्यांचो भोवमान करतले. तशेंच बारावेचे परिक्षेंत संस्कृत विशयांत उणेच 95 टक्के गूण मेळयतल्या सगल्या हेर ज्ञातींतल्या विद्यार्थ्यांचोय भोवमान जातलो. मराठी विशयांत अर्ज केल्ल्यां मदल्या सगल्यांत चड गूण मेळयिल्ल्या पयल्या तीन ज्ञातीबांधव विद्यार्थ्यांचोय भोवमान करतले.
वयल्या निकशाक अणसरून पांच विद्यार्थ्यांनी आपली गुणपत्रिका, नामो आनी फोना सयत 12 जुलय 2022 मेरेन संस्थेच्या कार्यालयांत वा उषा टेंगसे 7666118434 वा सीमा प्रभुदेसाय 9890809449 हांच्या व्होट्सअॅपाचेर धाडच्यो. 12 जुलया उपरांत आयिल्ल्या गुणपत्रिकांचो विचार जावचो ना. इत्सुकांनी द्रविड ब्राह्मण संघ, राज आॅर्टिन्स प्लाझा, राज गलेरिया फाटल्यान, फोंडें हांगा वा द्रविड ब्राह्मण संघाचे सचीव 9422441041 ह्या क्रमांकाचेर संपर्क सादचो अशें कळीत केलां.