गोंयचो दादल्यां पंगड हारलो

भांगरभूंय | प्रतिनिधी

सय्यद मुश्ताक अली टी-20 क्रिकेट सर्तींत गोंयच्या दादल्यां पंगडाक तिसरे हारीक तोंड दिवचें पडलें. जयपूरच्या सवाई मानसिंग स्टेडियमाचेर जाल्ले मॅचींत ताका दिल्ली पंगडान 6 विकेटींनी हारयलो.

दिल्लीच्या जैतांत मुखेली नितीश राणा आनी यश धूळ पर्जळ्ळें. दोगांयनी चवथे विकेटी खातीर 70 धांवड्यांची भागिदारी करून आपल्याक पंगडाक 6 विकेटीनी जैत मेळोवन दिलें.

नितीश राणान 38 बॉलांनी नाबाद 49 धांवड्यांची खेळी केली. हातूंत सात चवक्यांचो आस्पाव आशिल्लो, जाल्यार यश धुलान 41 बॉलांनी 46 धांवड्यो केल्यो. ताणें स चवके मारले.

ते पयलीं टॉस हारल्या उपरांत पयलीं बॅटींग करतना गोंयान निर्धारीत 20 ओव्हरींनी 6 विकेटी वगडावन 131 धांवड्यो केल्यो. दीपराज गांवकारान सगल्यांत 40 धांवड्यो केल्यो. ताणें 32 बॉलांक तोंड दितना चार चवके आनी एक सको मारलो. ताचे खेरीत मुखेली स्नेहल कवठणकार आनी सिद्धेश लाड हांणी दरेकी 20 धांवड्यांचें योगदान दिलें.

दिल्ली पंगडा वतीन नवदीप सिंगान दोन विकेटी घेतल्यो. गोंयचे स मॅचींतल्यान 12 गूण आसात आनी तो आपली निमाणी लीग मॅच 22 ऑक्टोबराक पुडुचेरी आड खेळटलो.

थोडे भितर धांवतकटोः गोंय, 20 ओव्हरींनी 6 बाद 131 धांवड्यो (स्नेहल कवठणकार 20, अर्जुन तेंडुलकर 15, दीपराज गांवकार 40, सुयश प्रभुदेसाय 4, सिद्धेश लाड 20, दर्शन मिशाळ नाबाद 13 आनी तुनिष सावकार नाबाद 12 धांवड्यो, नवदीप सैनी 2-34, कुलवंत खेजरोलिया 1-19) हार आड दिल्ली, 17 ओव्हरींनी 4 बाद 133 धांवड्यो (यश धूल 46, अनूज रावत 11, नितीश राणा नाबाद 49, आयुष बदोनी नाबाद 20 धांवड्यो, अर्जुन तेंडुलकर 1-28, लक्ष्य गर्ग 1-31, अमित यादव 2-22).