भांगरभूंय | प्रतिनिधी
पणजी, प्रतिनिधी: कोवीड १९च्या ल्हारांतल्यान सुटका जाता थंयच आसा. आतां कोविडच्या जेएन.1 व्हेरिएंटान गोंयचेर घालो घाला. हालींच केरळांत ह्या दुयेंसाचें वारें व्हावतालें. आतां हें वारें गोंयांतूय पावलां. गोंयच्या १८ जाणांक ह्या व्हेरिएंटची लागण जाल्या. हालींच जाल्ल्या आंतरराष्ट्रीय चित्रपट महोत्सवांत आयिल्ल्या लोकांक हाची लागण जाल्ल्याची म्हायती सुत्रांनी दिल्या. हेच फाटभूंयेर केंद्रीय भलायकी मंत्री मनसुख मांडविया हांणी आयज सगळ्या राज्यांच्या मंत्र्यांची बसका आपयल्या.
करोनाच्या ‘जेएन.१’ उपप्रकाराचे ‘व्हेरिएंट ऑफ इंटरेस्ट’ गटांत वर्गीकरण
संवसारीक भलायकी संघटणेन कोरोन व्हायरसाच्या जेएन.१ ह्या नव्या उपप्रकाराचें ‘व्हेरिएंट ऑफ इंटरेस्ट’ ह्या गटांत वर्गीकरण केलां. पूण हो व्हायरस लोकांचे भालयकेक व्हडलोसो धोको निर्माण करिना. आतां मेरेन उपलब्ध जाल्ल्या पुराव्यां प्रमाण जेएन.१ भलायके खातीर धोक्याचें ना. सध्या उपलब्ध आशिल्लें लस कोरोनाक प्रतिकार करतात आनी भलायकेच्या धोक्यांतल्यान दुयेंतींची राखण करतात अशें संवसारीक भलायकी संघटणेन निवेदन दिलां. ह्यान पयलीं जेएन.१ व्हायरसाचो मूळ वंश बीए.२.८६ क ही ‘व्हेरिएंट ऑफ इंटरेस्ट’ ह्या गटांत घातिल्लें
व्हेरिएंट ऑफ इंटरेस्ट म्हळ्यार कितें?
संवसारीक भलायकी संघटणेन करोना व्हायरसाच्या सगळ्या तरेच्या व्हेरिएंट ऑफ इंटरेस्ट, व्हेरिएंट ऑफ कंसर्न आनी व्हेरिएंट अंडर मॉनिटरिंग ह्या तीन श्रेणींत वर्गीकरण केलां. जेन्ना व्हायरसाचो एक प्रकार जायत्या देशांनी नेटान पातळटा आनी ताच्या मूळ जातीपरस व्हायरसाचे चड प्रकार मेळटात. तेन्ना त्या व्हायरसाच्या उपप्रकाराक व्हेरिएंट ऑफ इंटरेस्ट ह्या गटांत घालतात. वेरिएंट ऑफ कन्सर्न हो एक प्रकारचो व्हायरस संसर्ग आसून तो नेटान पातळटा, जाल्यार हो व्हायरस गट भलायकेचे त्रास निर्माण करता आनी रोग प्रतिकार शक्तीकूय आयकना.
मांडवीय हांची बसका जाली
चीन, अमेरिका आनी युरोपांत कोरोनाचो नवो व्हेरिएंट बरोच पातळ्ळा. आतां भारतांतूय तो पावला. ह्या व्हेरिएंटचे ११ डिसेंबराक ९३८ दुयेंती आशिल्ल्ले. १९ डिसेंबराक दुयेतींचो आंकडो १,९७० वयर पावला. म्हळ्यार णव दिसांनी हे दुयेंती दुपेट्टीन वाडल्यात. ताका लागून आयज भलायकी मंत्री मनसुख मांडविया हांणी सगळ्या राज़्याच्या मंत्र्यांची बसका आपयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
